ایلون مسک کو خلا میں مزید سیٹلائٹس لانچ کرنے کی اجازت مل گئی
نیویارک: (ویب ڈیسک) ایلون مسک کی خلائی کمپنی سپیس ایکس کو اپنا انٹرنیٹ نیٹورک بڑھانے کیلئے خلا میں مزید سٹار لنک سیٹلائٹس لانچ کرنے کی اجازت مل گئی۔
امریکا کے وفاقی مواصلاتی کمیشن نے اجازت کے ساتھ کمپنی کے جنریشن 2 سیٹلائٹس میں اپ گریڈز کی منظوری بھی دی ہے جس کے بعد کمپنی دنیا کے مزید حصوں میں اپنی براڈ بینڈ اور موبائل سروسز کو بڑھا سکے گی۔
امریکی ادارے نے بیان میں کہا کہ اس منظوری کے تحت سپیس ایکس کو 7500 مزید جنریشن 2 اسٹار لنک سیٹلائٹس بنانے، لانچ کرنے اور انہیں آپریٹ کرنے کی اجازت دی گئی ہے۔
بیان میں مزید کہا گیا کہ اس توسیع سے سپیس ایکس کو عالمی سطح پر ہائی سپیڈ انٹرنیٹ سروس فراہم کرنے میں مدد ملے گی۔
واضح رہے کہ خلا میں موجود فعال سیٹلائٹس میں دو تہائی ایلون مسک کی سٹار لنک کے ہیں، زمین کے نچلے مدار میں 9000 سے زائد سٹار لنکس کا نیٹورک موجود ہے۔
