بھیڑچال! جرمنی میں درجنوں بھیڑیں سپر سٹور میں داخل، افراتفری مچ گئی
برلن :(دنیا نیوز) جرمنی کے علاقے لوئر فرانکونیا کے قصبے برگزن میں ایک دلچسپ واقعہ پیش آیا، جہاں تقریباً 50 بھیڑیں اپنے چرواہے سے بچ نکل کر قریبی گروسری سٹور میں جا داخل ہو گئیں۔
پینی سپر مارکیٹ میں بنائی گئی ویڈیو میں دیکھا جا سکتا ہے کہ درجنوں بھیڑیں مرکزی دروازے سے سٹور کے اندر داخل ہوئیں، جس کے باعث اندر افراتفری مچ گئی، بھیڑوں کی وجہ سے سٹور کے اندر نقصان ہوا اور جگہ جگہ گندگی پھیل گئی۔
مقامی پولیس نے واقعے کی تصدیق کرتے ہوئے بتایا کہ بھیڑیں چرواہے ڈیٹر مشلر کے ریوڑ سے الگ ہو گئی تھیں، جو انہیں سن دریا کی جانب لے جا رہے تھے جب کہ چرواہے نے بتایا کہ پارکنگ ایریا میں پڑی بلوط کی گریاں بھیڑوں کی توجہ کا سبب بنیں، جس کے بعد وہ مزید خوراک کی تلاش میں سٹور کے اندر چلی گئیں۔
ڈیٹر مشلر نے بتایا کہ جب وہ موقع پر پہنچے تو بھیڑیں سٹور سے باہر آچکی تھیں اور بعد ازاں انہیں باحفاظت دوبارہ ریوڑ کے ساتھ ملا دیا گیا، خوش قسمتی سے اس واقعے میں کوئی جانی نقصان نہیں ہوا۔
