روسی صدر کا ایرانی و اسرائیلی صدور سے ٹیلیفونک رابطہ، علاقائی استحکام پر گفتگو
ماسکو: (شاہد گھمن سے) روسی صدر ولادیمیر پیوٹن نے مشرقِ وسطیٰ میں بڑھتی کشیدگی کے پس منظر میں ایران کے صدر مسعود پزیشکیان اور اسرائیلی وزیرِاعظم بنیامین نیتن یاہو سے الگ الگ ٹیلیفونک رابطہ کیا جس میں ایران کے گرد کشیدہ صورتحال اور علاقائی استحکام پر گفتگو کی گئی۔
کریملن کے بیان کے مطابق ایرانی صدر مسعود پزیشکیان سے گفتگو میں دونوں ممالک کے سربراہان نے ایران اور خطے کی مجموعی صورتحال کو جلد معمول پر لانے کی ضرورت پر زور دیا۔
اس موقع پر ماسکو اور تہران نے اپنے اسٹریٹیجک شراکت داری کو مضبوط بنانے اور مختلف شعبوں میں مشترکہ اقتصادی منصوبوں کے عملی نفاذ کے عزم کا اظہار کیا، ایرانی صدر نے پیوٹن کو اسلامی جمہوریہ کے اندر صورتحال معمول پر لانے کیلئے جاری اقدامات سے بھی آگاہ کیا۔
تجزیہ کاروں کے مطابق روس مشرقِ وسطیٰ میں کشیدگی میں کمی اور فریقین کے درمیان رابطوں کی بحالی کیلئے ڈپلومیٹک پراکسی کا کردار ادا کرتا نظر آ رہا ہے۔
اسی طرح اسرائیلی وزیراعظم سے رابطے میں صدر پیوٹن اور نیتن یاہو نے خطے کے موجودہ حالات اور ایران کے حوالے سے تازہ پیشرفت پر بات چیت کی، روسی صدر نے کہا کہ خطے میں استحکام اور سکیورٹی یقینی بنانے کیلئے سیاسی و سفارتی اقدامات کو تیز کرنا ضروری ہے۔
انہوں نے اس بات کی بھی تصدیق کی کہ روس تمام متعلقہ ممالک کی شمولیت کے ساتھ مذاکرات اور ثالثی کی کوششیں جاری رکھنے کیلئے تیار ہے، دونوں رہنماؤں نے باہمی رابطے جاری رکھنے پر بھی اتفاق کیا۔
