×

دنیا

روس کا 24 گھنٹوں میں 1,330 یوکرینی فوجیوں کی ہلاکت، 2 اہم علاقوں پر کنٹرول کا دعویٰ

بند کریں

ماسکو:(شاہد گھمن) روسی وزارت دفاع نے دعویٰ کیا ہے کہ گزشتہ 24 گھنٹوں کے دوران مختلف محاذوں پر لڑائی میں یوکرینی فوج کو تقریباً 1,330 اہلکاروں کا نقصان ہوا، جبکہ روسی افواج نے خارکوف ریجن میں کازاچیا لوپان اور ڈونیسک میں سویاتوگورسک کا کنٹرول حاصل کر لیا ہے۔

روسی وزارت دفاع کے مطابق بیٹل گروپ نارتھ کے محاذ پر یوکرینی فوج کے تقریباً 200، بیٹل گروپ ویسٹ کے علاقے میں 205 سے زائد، بیٹل گروپ ساؤتھ کے محاذ پر 140 سے زائد، بیٹل گروپ سینٹر کے علاقے میں 410 سے زائد، بیٹل گروپ ایسٹ کے محاذ پر 325 سے زائد جبکہ بیٹل گروپ دنیپر کے علاقے میں 50 تک یوکرینی فوجیوں کو نقصان پہنچا۔

انہوں نے کہا کہ روسی فضائیہ، ڈرون یونٹس، میزائل فورسز اور توپ خانے نے گزشتہ ایک روز کے دوران یوکرین کے 152 مقامات پر فوجی اہداف کو نشانہ بنایا، ان اہداف میں ایک فوجی ہوائی اڈہ، لاجسٹک اور ڈسٹری بیوشن مراکز، ایندھن، توانائی اور ٹرانسپورٹ کی تنصیبات، ڈرون تیار اور ذخیرہ کرنے کے مقامات اور یوکرینی فوج و غیر ملکی جنگجوؤں کے عارضی ٹھکانے شامل تھے۔

روسی وزارت دفاع کے مطابق کیف ریجن کے شہر وشنووئے کے قریب واقع اسٹیلر جیٹ لاجسٹکس ہب کو گیران-4 سیکر ڈرونز سے نشانہ بنایا گیا اور مقررہ ہدف کو کامیابی سے تباہ کیا گیا، بیٹل گروپ نارتھ نے کارروائی کے دوران خارکوف ریجن کے کازاچیا لوپان قصبے کا کنٹرول بھی حاصل کر لیا۔

وزارت دفاع نے یہ بھی کہا کہ ڈونیسک میں بیٹل گروپ ویسٹ نے سویاتوگورسک شہر کا کنٹرول حاصل کرنے کے بعد عمارتوں کے تہہ خانوں میں موجود ممکنہ یوکرینی جنگجوؤں کی تلاش اور کلیئرنس آپریشن شروع کر دیا ہے۔

اس سے قبل صدر ولادیمیر پوتن نے بھی صحافیوں سے گفتگو میں کہا تھا کہ روسی افواج نے گزشتہ ماہ متعدد آبادیوں کا کنٹرول حاصل کیا، جن میں کازاچیا لوپان اور سویاتوگورسک بھی شامل ہیں۔

روسی وزارت دفاع کے مطابق اوڈیسا ریجن میں داچنوئے کے قریب اوڈیسا-22 ڈسٹری بیوشن سینٹر اور نیروبائسکوئے، نیکولائیف ریجن کے ووسکریسینسکوئے اور زاپوروزیے میں تین دیگر لاجسٹک مراکز کو گیران-4 سیکر ڈرونز سے نشانہ بنایا گیا۔

وزارت نے کیف شہر میں ایک اور لاجسٹک مرکز پر بھی گیران-4 سیکر ڈرون سے حملے کی اطلاع دیتے ہوئے کہا کہ ہدف کو نشانہ بنایا گیا، روسی بلیک سی فلیٹ نے بحیرہ اسود میں یوکرینی بحریہ کی ایک بغیر پائلٹ کشتی تباہ کرنے کا بھی دعویٰ کیا ہے۔

روسی وزارت دفاع کے مطابق فضائی دفاعی نظام نے گزشتہ 24 گھنٹوں کے دوران 464 یوکرینی فکسڈ وِنگ ڈرونز، چار گائیڈڈ فضائی بم اور امریکی ساختہ ہِمَرز نظام کے دو راکٹ بھی مار گرائے۔