قرآن پاک کی بے حرمتی:جنرل اسمبلی اجلاس میں مسلم رہنماؤں کا احتجاج
نیویارک (مانیٹرنگ ڈیسک)جنرل اسمبلی کے 78 ویں اجلاس میں ترکیہ، ایران اور قطر نے سویڈن اور ڈنمارک میں قرآن پاک کی بے حرمتی کے واقعات پر احتجاج کرتے ہوئے عالمی فورم سے سخت اقدام کا مطالبہ کیا۔
نیوز ایجنسی کے مطابق امیر قطر شیخ تمیم بن حمد الثانی نے اجلاس سے خطاب میں کہا کہ قرآن پاک اللہ تعالیٰ کی مقدس کتاب ہے جس کے ماننے والوں کی تعداد اربوں میں ہے ،مقدس کتاب کی بے حرمتی کے واقعات پر مسلم دنیا کی دل آزاری ہوئی، آزادی اظہار کے نام پر دانستہ ایسے واقعات کی اجازت نہیں دی جا سکتی۔ تر کیہ کے صدر طیب اردوان نے کہا کہ قرآن پاک کی بے حرمتی کے واقعات ناقابل برداشت ہیں، ان واقعات میں ملوث عناصر اسلاموفوبیا اور نسل پرستی میں مبتلا ہیں،یہ سوچ عالمی امن کیلئے خطرہ ہے ۔انہوں نے کہا کہ اقوام متحدہ سمیت تمام عالمی اداروں کو اسلاموفوبیا کے تدارک کی منظم کوششیں کرنی چاہئیں۔ ایرانی صدر ابراہیم رئیسی نے کہا کہ مغربی ممالک میں مسلم تشخص کو زک پہنچائی جا رہی ہے ، قرآن پاک کی بے حرمتی سے لے کر سکولوں میں حجاب پر پابندی کی سخت الفاظ میں مذمت کرتے ہیں، عالمی فورم کو بھی مذمت کرنی چا ہئے ۔ انہوں نے کہا کہ اسلامی شعائر کی توہین ناقابل برداشت ہے ، مغربی ممالک آزادی اظہار کے نام پر توہین قرآن بند کریں۔
