بھارتی انتخابات سے قبل پلوامہ جیسے حملے ہو سکتے :ستیہ پال
نئی دہلی (این این آئی)مقبوضہ جموں وکشمیر کے سابق گورنر ستیہ پال ملک نے پلوامہ حملے کی بھارتی سپریم کورٹ کی زیر نگرانی تحقیقات کا مطالبہ کرتے ہو ئے کہا ہے کہ مودی حکومت اپنی غلطیوں کو تسلیم کرنے میں ناکام رہی ہے ۔
ستیہ پال ملک نے پریس کلب آف انڈیا میں پریس کانفرنس سے خطاب میں کہا کہ وزیر اعظم نریندرمودی نے انکی طرف سے رواں برس اپریل میں پلوامہ حملے بارے اٹھائے گئے سنگین سوالات کا تاحال جواب نہیں دیا ۔ دوبارہ کہہ رہا ہوں حکومت نے سی آرپی ایف جوانوں کو سفر کیلئے طیارہ فراہم نہیں کیا، اگر طیارہ فراہم کیا گیا ہوتا تو اہلکار مارے نہ جاتے ۔ وزیر اعظم مودی نے بالاکوٹ حملے اور سی آر پی ایف جوانوں کی ہلاکت پر سیاست کی تھی اور ووٹروں سے کہا تھا وہ اپنا ووٹ ان بہادر فوجیوں کے نام کریں۔ انہوں نے کہا کہ الیکشن جیتنا مودی کی واحد ترجیح ہے لہذا عوام کو ہوشیار رہنے کی ضرورت ہے کیوں کہ اس بار بھی پارلیمانی انتخابات سے قبل ایسے ہی حملے ہوسکتے ہیں۔
