دوحہ کانفرنس، افغانستان میں امن کیلئے پاک امریکا تجاویز کا تبادلہ
دوحہ(آئی این پی)افغانستان کی صورتحال پر پاکستان اور امریکہ کے مابین رابطہ ہوا ہے جس میں قیام امن کیلئے تجاویز پر تبادلہ خیال کیا گیا۔
دوحہ میں امریکی نمائندہ خصوصی برائے افغانستان نے پاکستانی وفد سے ملاقات کی جس میں افغانستان کی صورتحال پر مشاورت اور قیام امن کے لیے تجاویز کا تبادلہ کیا گیا۔ ذرائع کے مطابق اقوام متحدہ کے تحت دوحہ میں جاری تیسری افغان کانفرنس کے موقع پر امریکی نمائندہ خصوصی برائے افغانستان ٹام ویسٹ کی پاکستانی وفد سے سائیڈ لائن ملاقات ہوئی جس میں افغان مسئلے پر مشاورت کی گئی۔ملاقات میں نمائندہ خصوصی آصف درانی، قطر میں پاکستانی سفیر ڈاکٹر محمد اعجاز اور کابل میں ہیڈ آف مشن ایمبیسیڈر عبیدالرحمن نظامانی شریک تھے ۔ذرائع کے مطابق افغان کانفرنس کے موقع پر پاکستانی وفد کی دیگر ممالک کے وفود سے بھی ملاقاتیں ہوئیں جبکہ روسی نمائندہ خصوصی ضمیر کابلوف سے بھی پاکستانی وفد کی ملاقات ہوئی۔
