مسئلہ کشمیرسلامتی کونسل ایجنڈے پر موجود ،حتمی حل باقی :پاکستان
نیویارک (آئی این پی )پاکستان نے اقوام متحدہ کی سلامتی کونسل میں مسئلہ کشمیر بھرپور انداز میں اٹھا تے ہوئے پائیدار امن کے قیام کے لیے سلامتی کونسل پر تنازعات کی بنیادی وجوہات حل کرنے پر زور دیا ہے ۔
یو این مشن کے جاری اعلامیے کے مطابق وزیراعظم کے معاون خصوصی طارق فاطمی نے سلامتی کونسل میں منعقدہ کھلی بحث میں خطاب کرتے کہا مسئلہ کشمیر بدستور سلامتی کونسل ایجنڈے پر موجود ہے ، اس کا منصفانہ اور حتمی حل باقی ہے ۔ بین الاقوامی امن اور سلامتی کی بحالی اس میں کارگر ثابت ہوگی۔ کشمیری عوام سے استصوابِ رائے کے ذریعے حق خود ارادیت کے حصول کا وعدہ کیا گیا تھا، سلامتی کونسل کی ذمہ داری ہے کہ وہ کشمیری عوام کے اس حق کو یقینی بنائے ۔ سلامتی کونسل تنازع کے منصفانہ اور دیرپا حل کیلئے اپنی قراردادوں پر عمل درآمد کے لیے فوری اقدامات کرے ۔طارق فاطمی نے شرکا کو بتایا کہ پاکستان سب سے طویل عرصے سے خدمات انجام دینے والے ممالک میں شامل ہے ، پاکستان امن قائم کرنے والے کمیشن کا بانی رکن بھی ہے ۔ پاکستان نے ابتک 48 مشنز میں 2 لاکھ 35 ہزار سے زائد امن اہلکار تعینات کیے ، 181 پاکستانی اہلکار عالمی امن وسلامتی کے لیے جانوں کا نذرانہ پیش کر چکے ۔طارق فاطمی کے مطابق 3ہزار 267 سے زائد پاکستانی مرد و خواتین 7 مختلف یو این مشنز میں خدمات انجام دے رہے ۔
