پاکستان اور آذر بائیجان کا قانونی و عدالتی تعاون کیلئے معاہدہ
باکو (نیوز ایجنسیاں) پاکستان اور آذربائیجان نے قانونی اور عدالتی شعبوں میں تعاون گہرا کرنے کے لیے یادداشت پر دستخط کیے ہیں۔وزارت قانون و انصاف کےجاری اعلامیے کے مطابق وزیر قانون و انصاف اعظم نذیر تارڑ نے آذربائیجان کے شہر باکو کا دورہ کیا۔۔۔
جس کا اہم مقصد وزارت قانون و انصاف پاکستان اور آذربائیجان کی وزارت انصاف کے درمیان تعاون کی یادداشت پر دستخط تھا جس میں قانونی و عدالتی تعاون، تنازعات کے حل کے متبادل طریقہ کار کو فروغ دینا، قانونی خدمات کی ڈیجیٹل تبدیلی، علم اور مہارت کا تبادلہ شامل ہے ۔ اعظم نذیر تارڑ نے آذربائیجان کے وزیر اعظم علی اسدوف سے ملاقات کی جس میں دوطرفہ تعاون بڑھانے میں قانونی سفارت کاری کی اہمیت پر زور دیا گیا۔ اعظم نذیر تارڑ نے اپنے ہم منصب فرید احمدوف کے ساتھ تفصیلی ملاقات کی جس میں قانونی جدید کاری، ادارہ جاتی تبادلوں اور قانون کی حکمرانی جیسے شعبوں پر تفصیلی تبادلہ خیال کیا گیا۔ اعظم نذیر تارڑ نے سپریم کورٹ آف آذربائیجان کے چیئرمین انعام کریموف سے بھی ملاقات کی اور عدالتی اصلاحات، عدالتی نظام کی ڈیجیٹلائزیشن اور تنازعات کے حل کا طریقہ کار مضبوط بنانے کے امکانات کا جائزہ لیا۔
