’’2025،پاکستان کا عالمی سیاست میں مقام بلند ہوا‘‘
مئی میں پاک بھارت کشیدگی نے پاکستانی دفاعی صلاحیت اور ساکھ کو مضبوط کیا ٹرمپ کا کشمیر پر بیان پاکستان کی سفارتی پوزیشن اور موقف کی تائید :عالمی جریدہ
چیپل ہل (مانیٹرنگ ڈیسک)عالمی جریدے کیرولیناپولیٹیکل ریویو نے اپنی رپورٹ میں کہا ہے کہ 2025 میں پاکستان نے عالمی سیاست میں دوبارہ اہم مقام حاصل کیا،مئی میں پاک بھارت کشیدگی نے پاکستانی دفاعی صلاحیت اور ساکھ کو مضبوط کیا، پاکستان نے موثر سفارت کاری سے واشنگٹن کا اعتماد بحال کر کے تعلقات کو نئی سمت دی۔عالمی جریدے کے مطابق امریکا نے جنوبی ایشیا، خلیج اور وسط ایشیا تک رسائی میں پاکستان کو کلیدی پُل قرار دیا، امریکا نے پاکستان کی جغرافیائی اہمیت کو مرکزی حیثیت دی۔پاکستانی بندرگاہیں خاص طور پر بلوچستان میں گوادر بہت بڑا اثاثہ ہے ، پاکستان نے سی پیک کے ساتھ کثیرالجہتی توازن برقرار رکھ کر نئے معاشی راستے کھولے ہیں۔
کیرولیناپولیٹیکل ریویو کی رپورٹ کے مطابق نومبر میں ٹرمپ انتظامیہ نے اپنی قومی سلامتی کی حکمت عملی شائع کی، امریکی قومی سلامتی کے مفادات کے حصول کیلئے پاکستان کلیدی اتحادی ہوگا۔ امریکا اور پاکستان کے تعلقات میں حالیہ تبدیلی نے دنیا بھر کے میڈیا کو اپنی طرف متوجہ کیا ۔ صدر ٹرمپ کا کشمیر پر بیان ، پاکستان کی سفارتی پوزیشن اور موقف کی تائید ہے ، پاکستان نے سفارتی محاذ پر نفسیاتی برتری حاصل کی جبکہ بھارت پیچھے رہ گیا۔عالمی جریدے نے لکھا کہ لابنگ اور پالیسی انگیجمنٹ سے تعلقات کو وار آن ٹیرر فریم سے اکانومی اور سٹراٹیجی کی طرف موڑا ، پاکستان اور امریکا نے معدنیات سے ریفائننگ، پروسیسنگ کیلئے 500 ملین ڈالر کے کئی سودے کئے ۔ایگزم بینک نے بلوچستان میں ریکوڈک میں کان کنی اور معدنیات کے لیے 1.25 بلین ڈالر فنانسنگ منظور کی، پاکستان نے ری انگیجمنٹ کر کے امریکا کے ساتھ رشتے کو پائیدار مفاد کی سمت بڑھایا۔
