عثمان ہادی کے 2 قاتل بھارت فرارہونے کی تصدیق
ملزم فیصل کریم مسعود اور عالمگیر شیخ نے بھارت کی ریاست میگھالیہ میں پناہ لی شوٹرزکو بھارت فرارہونے کے سہولت کاروں سمیت 11افراد گرفتار:پولیس
ڈھاکہ (اے ایف پی)بنگلہ دیش میں انقلاب مانچا کے ترجمان شریف عثمان ہادی کے قتل کے دو مرکزی ملزم بھارت فرار ہوگئے ۔بنگلہ دیش کے دارالحکومت ڈھاکہ میں ڈھاکہ میٹروپولیٹن پولیس کے ایڈیشنل کمشنر ایس این محمد نذر الاسلام نے گزشتہ روز پریس کانفرنس میں تصدیق کی کہ ملزم فیصل کریم مسعود اور عالمگیر شیخ نے بھارت فرار ہونے کے بعد ریاست میگھالیہ میں پناہ لی،اس پریس کانفرنس سے قبل پولیس حکام کا کہناتھا کہ انہیں ملزموں کے ٹھکانے کا علم نہیں۔نذرالاسلام نے بتایاکہ عثمان ہادی کا قتل منصوبہ بندی کے تحت کیا گیا، اس سلسلے میں 11 افراد کو گرفتار کیا گیا ہے جن میں وہ لوگ بھی شامل ہیں جنہوں نے شوٹرز کو بھارت فرار ہونے میں مدد فراہم کی۔
سی سی ٹی وی فوٹیج کے تجزئیے اور انفارمیشن ٹیکنالوجی کی مدد سے پولیس نے شوٹر فیصل کریم مسعود اور ان کے معاون موٹرسائیکل سوار عالمگیر شیخ کو واقعہ کے دن ہی شناخت کر لیا تھا۔ پولیس نے دو غیر ملکی پستول، میگزین، 52 گولیاں اور ایک شاٹ گن برآمد کرنے کا دعویٰ بھی کیا جو واقعہ میں استعمال ہوئیں جبکہ ایک موٹرسائیکل، جعلی نمبر پلیٹس اور گولیوں کے خول بھی برآمد ہوئے ۔پولیس کی جانب سے بتایا گیا کہ تقریباً 53 بینک اکاؤنٹس کے دستخط شدہ چیکس برآمد ہوئے ہیں جن کی مالیت 218 کروڑ ٹکا ہے ۔واضح رہے شریف ہادی عثمان کو ڈھاکہ میں اس وقت نشانہ بنایا گیا تھا جب وہ ایک مسجد سے باہر نکل رہے تھے ۔عثمان ہادی شیخ حسینہ واجد کی حکومت کے خلاف طلبہ کی ملک گیر تحریک کے صفِ اول کے رہنماؤں میں شامل تھے ۔ مظاہرین اس قتل کا الزام براہِ راست بھارت پر عائد کر رہے ہیں۔
