فواد سے پارٹی عہدہ واپس، عمرچیمہ تحریک انصاف کے سیکرٹری اطلاعات مقرر
پاکستان تحریک انصاف کے چیئرمین وزیر اعظم عمران خان نے پارٹی تنظیم نو کے حوالے سے بڑا فیصلہ
اسلام آباد(خصوصی نیوز رپورٹر)پاکستان تحریک انصاف کے چیئرمین وزیر اعظم عمران خان نے پارٹی تنظیم نو کے حوالے سے بڑا فیصلہ کرتے ہوئے فواد چودھری سے پارٹی عہدہ واپس لیکر انکی جگہ عمر سرفراز چیمہ کوپارٹی کا سیکرٹری اطلاعات مقررکردیا ،تحریک انصاف کے سیکرٹری جنرل ارشد داد نے باضابطہ طور پر نوٹیفکیشن جاری کردیا ۔پارٹی کے مرکزی میڈیا سیل کی جانب سے جاری تفصیلات کے مطابق چیئرمین تحریک انصاف عمران خان کی منظوری سے عمر سرفراز چیمہ کوتحریک انصاف کا مرکزی سیکرٹری اطلاعات مقررکردیا گیا ہے ۔ عمر سرفرازچیمہ کی بطورمرکزی سیکرٹری اطلاعات تقرری پر چیئرمین تحریک انصاف اور مرکزی سیکرٹری جنرل نے ان کیلئے نیک تمناؤں اور جذبات کا اظہار کیا ہے ۔مرکزی سیکرٹری اطلاعات عمر چیمہ نے بھرپور اظہار اعتماد اور مرکزی تنظیم میں اہم ذمہ داری سونپنے پر چیئرمین عمران خان اور سیکرٹری جنرل ارشد داد کا شکریہ ادا کیا ۔ذرائع کے مطابق وزیر اعظم اور پارٹی چیئرمین عمران خان کی جانب سے پارٹی کو فعال کرنے کا فیصلہ کیا گیا ہے جس کے تحت سرکاری اور پارٹی عہدہ رکھنے والے باقی ماندہ لوگوں سے پارٹی عہدے واپس لے کر انکی جگہ نئے عہدیدار تعینات کیے جائیں گے ۔
