گیس مہنگی ہوگی، گھریلو صارفین کیلئے اضافہ 5سو روپے سے زائد نہیں ہوگا: وزیر توانائی
اسلام آباد(وقائع نگارخصوصی، مانیٹرنگ ڈیسک)نگران وفاقی وزیر توانائی محمد علی نے کہا ہے گیس کی قیمت ضرور بڑھے گی تاہم گھریلو صارفین کیلئے یہ اضافہ 500 روپے سے زیادہ نہیں ہوگا جبکہ دیگر صارفین کیلئے اضافہ زیادہ ہوگا۔
آئندہ موسم سرما میں بھی گیس کی اتنی ہی لوڈشیڈنگ ہوگی جتنی گزشتہ سال تھی، پٹرولیم مصنوعات کی قیمتوں کا تعین 30 ستمبر کو ہوگا،قیمتوں میں کمی کے حوالے سے ابھی کچھ کہنا قبل از وقت ہے ،ڈالر کی قدر میں کمی کا سلسلہ جاری رہاتو ضرور مثبت پیشرفت کی توقع ہے ۔ پاور سیکٹر کے حوالے سے میڈیا کو بریفنگ دیتے ہوئے نگران وزیر توانائی نے کہا کہ گیس سیکٹر میں روزانہ ایک ارب روپے کا نقصان ہورہا ہے ، گیس کا گردشی قرضہ 2800 سے 2900 ارب روپے ہوگیا ہے اس لئے گیس کے شعبے میں بہتری کیلئے قیمتوں میں اضافہ ناگزیر ہے اور اس حوالے سے کام جاری ہے ۔قیمتوں میں اضافے کے وقت 60 فیصد صارفین کو پروٹیکٹ کیا جائے گا،کوشش ہے غریب صارفین پر 5 سو سے زائد کا بوجھ نہ پڑے ،امیر طبقے کیلئے گیس کی قیمتوں میں اضافہ زیادہ ہوگا۔انہوں نے کہا بجلی کی تقسیم کار کمپنیوں کی نجکاری پہلے ہی فہرست میں شامل ہے ، وفاقی کابینہ کی منظوری کے بعد ڈسکوز کی نجکاری نگران دور میں مکمل کرلیں گے ، اگر نجکاری مکمل نہ بھی ہوسکی تو اگلے مرحلے تک ضرورلے جائیں گے ۔
انہوں نے کہا ڈسکوز کے حوالے سے 3تجاویز پر کام کیا جا رہا ہے ۔ پہلی تجویز کے تحت ڈسکوز کی نجکاری زیر غور ہے ، نجکاری کے عمل کیلئے وزارت توانائی اور نجکاری کمیشن ملکر کام کریں گے ۔ دوسری تجویز کے تحت ڈسکوز کی مینجمنٹ 20 سے 25 سال کیلئے پرائیویٹ سیکٹر کو دی جائے ،تیسری تجویز ہے کہ ڈسکوز کو متعلقہ صوبوں کو دے دیا جائے گا۔نگران وفاقی وزیر نے کہا کمپنیوں کے بورڈ آف ڈائریکٹرز تبدیل کرنے جا رہے ہیں۔ بورڈ آف ڈائریکٹرز میں تبدیلیوں سے اصلاحات کا عمل شروع ہوگا۔بجلی کے نرخوں میں کمی کے بارے میں انہوں نے بتایاکہ ان کے خیال میں سب سے بہتر طریقہ یہ ہے کہ حکومتی اور نجی پاور پلانٹس کے قرض کی مدت کو بڑھا دیا جائے اور اس سلسلے میں آئی پی پیز کے ساتھ مذاکرات کئے جاسکتے ہیں ، اس کے سوا کوئی اور حل نہیں ہے ۔
