تعلیم،صحت،ملکی ترقی پر سیاست نہیں کرنی چاہئے:شہبازشریف
اسلام آباد (نامہ نگار، مانیٹرنگ ڈیسک ،اے پی پی)وزیر اعظم محمد شہباز شریف نے کہا ہے کہ حکومت مستحق مریضوں کو علاج و معالجہ کی مفت اور جدید ترین سہولیات فراہم کرنے کیلئے پرعزم ہے ، تعلیم و علاج کی سہولت بغیر کسی مشکل کے دہلیز پر ملنا غریب آدمی کا حق ہے۔
مجھ سمیت اشرافیہ دنیا بھر میں جہاں چاہے مہنگا ترین علاج کراسکتے ہیں، مگر عام آدمی کہاں جائے ۔جناح میڈیکل کمپلیکس جدید سہولیات سے آراستہ خطے کا ایک شاندار اور بے مثال ہسپتال ہوگا۔ جناح میڈیکل کمپلیکس کا سنگ بنیاد رکھنے کی تقریب سے خطاب کرتے ہوئے انہوں نے کہا کہ یہ منصوبہ نوازشریف کی قیادت اور مخلوط حکومت کا جڑواں شہروں کے لئے ہی نہیں بلکہ کے پی کے ،کشمیر اورگلگت بلتستان کے مریضوں کے لئے بھی تحفہ ہوگا،یہاں نرسنگ سکولز اور جدید لیب بنیں گی،اس جدید ہسپتال میں پیچیدہ ترین امراض کا علاج ہوگا۔آغا خان فاؤنڈیشن نے اس سنٹر کی تمام کنسلٹنسی بلامعاوضہ دی جس پران کے مشکور ہیں۔وزیر اعظم نے کہا کہ پرنس کریم آغا خان نے کمپلیکس کے لئے 600 کنال اراضی مختص کی جبکہ 200 کنال کا کمرشل سنٹر بھی اس ہسپتال کے نام کیا ، اس کی آمدن اس ہسپتال کے بننے والے ٹرسٹ میں جائے گی۔ یہ وہی ماڈل ہے جس کا نوازشریف نے اجرا کیاتھا کہ عام پاکستانی کیلئے علاج مفت ہو۔
انہوں نے کہا کہ تعلیم اور صحت کی سہولیات ہر پاکستانی کا حق ہے ،پی کے ایل آئی جنوبی ایشیا کا بہترین ہسپتال ہے ، تاریخ کا دلخراش واقعہ ہے ، نام نہاد منصف نے سازش کرکے پی کے ایل آئی کو تباہ کرنے کی بھرپور کوشش کی ، عام آدمی کی تعلیم و صحت اور ترقی و خوشحالی میں سیاست نہیں کرنی چا ہئے ۔ جب ملک میں بجلی کے اندھیرے تھے اور 2009 میں 20، 20 گھنٹے کی لوڈشیڈنگ تھی، الیکشن آئے تو میرے منہ سے نکل گیا کہ 6 ماہ میں ہم اندھیرے ختم کردیں گے ، میرا بہت مذاق اڑایا گیا۔ میں نے جذبات میں اخلاص کے ساتھ بات کی تھی، میں نے اللہ سے دعا کہ تو ہی عزت رکھنے والا ہے عزت رکھ لے ، پھر نواز شریف کی قیادت میں ملک بھر سے 20 گھنٹے کی لوڈشیڈنگ ختم ہوگئی اور دوبارہ اجالے آگئے ، اللہ سے دعا کریں کہ یہ ہسپتال ایک سال میں مکمل ہو، ملک میں امن و سکون ہو اور معاشی و سیاسی استحکام ہو ۔ان کا کہناتھاکہ جناح میڈیکل کمپلیکس میں مستحق مریضوں کو سو فیصد مفت علاج کی سہولیات مہیا کی جائیں گی تاہم صاحب حیثیت لوگوں کو علاج پر اٹھنے والے اخراجات برداشت کرنا پڑیں گے ۔ جناح میڈیکل کمپلیکس میں میڈیکل سکول قائم کیاجائیگا،یہ سنٹر صوبوں سے مزید ہم آہنگی اور رابطہ کا ذریعہ ہوگا،یہاں ایمرجنسی میں ا یئر ایمبو لینس دستیاب ہوگی،اس منصوبے کے لئے جتنے بھی فنڈز درکار ہوں گے وہ مہیا کئے جائیں گے ۔ اس منصوبے کی ایک سال میں تکمیل کی ہدایت کی ہے ،یہاں 24 گھنٹے کام ہوگا،اسی طرح آئی ٹی پارک بھی اس سال کے آخر تک مکمل کرنے کی ہدایت کی ہے ۔
