چائلڈ میرج،فارم کے کالم پر نہ کرنے پر نکاح رجسٹرار کو جیل بھیجنے کا حکم
لاہور (عمران اکبر )لاہور سمیت صوبہ بھر میں نابالغ بچوں کی شادی اور نکاح فارم کالم پر نہ کرنے کا انکشاف ہوا ہے ،سیکرٹری بلدیات پنجاب کو سو سے زائد کم عمر شادی اور نکاح فارم کے کیسز پر درخواستیں موصول ہوئیں۔
جس پر محکمہ بلدیات نے حکم جاری کردیا کہ نکاح رجسٹرار یاسیکرٹری کو غلطی کرنے پر سیدھا جیل بھیجا جائے گا ،محکمہ بلدیات پنجاب نے ایڈوائزری جاری کر دی، نکاح رجسٹرار اور سیکرٹری یونین کونسلز نکاح فارم کے کالم پر نہ کرنے کے ذمہ دار قرار دئیے گئے ،چائلڈ میرج ایکٹ 1929 اور مسلم فیملی لا آرڈیننس 1961 پرعملدرآمد میں کوتاہی کے مرتکب کو جیل بھیجنے کا فیصلہ کر لیا ۔چائلڈ میرج روکنے اور 1929 کے ایکٹ پر سختی سے عملدرآمد کیلئے ایڈوائزری جاری،ذرائع کے مطابق مسلم فیملی لا آرڈیننس کے تحت نکاح نامے کے تمام کالم پر کرنا لازم ہے ،مسلم فیملی آرڈیننس پر عملدرآمد نہ کرنے والے نکاح رجسٹرار کا لائسنس کینسل کیا جائے گا،نکاح رجسٹرار پر آرڈیننس کی خلاف ورزی پر فوری پیڈا ایکٹ لاگو کیا جائے گا، نکاح کے وقت کوائف کا اندارج یقینی بنانا رجسٹرار کی ذمہ داری ہے ،رجسٹرار خصوصاً عمر کا خانہ لازمی پر کرنے کا پابند ہو گا ،زبانی کلامی عمر سن کر نکاح پڑھانے والے نکاح رجسٹرار کو جیل بھیجا جائے گا،دوران نکاح دلہا اور دلہن کے شناختی کارڈ، بے فارم ، یا سکول سرٹیفکیٹ کی چیکنگ کو یقینی بنایا جائے ،میونسپل کمیٹیاں اور یونین کونسلز احکامات پر عملدرآمد یقینی بنائیں،سیکرٹری بلدیات پنجاب شکیل احمد میاں کا کہنا ہے کم عمری کی شادیوں کو روکنے میں رجسٹرا ر اور سیکرٹریز کردار ادا کریں ۔
