ہمار ا انقلاب پرا من ،کوئی دولت اور بندوق سے پاکستان کا مالک نہیں بن سکتا:حافظ نعیم
کراچی (سٹاف رپورٹر)امیر جماعت اسلامی پاکستان حافظ نعیم الرحمن نے منگل بازار گراؤنڈ گلشن اقبال میں الخدمت کے تحت بنوقابل ایپٹی ٹیوٹ ٹیسٹ کے ہزاروں طلبہ و طالبات سے خطاب کرتے ہوئے کہا ہے کہ پاکستان جرنیلوں، سرمایہ کاروں نہیں نوجوانوں کا ہے۔
کوئی اپنی دولت اور بندوق سے پاکستان کا مالک نہیں بن سکتا، ہم پاکستان کے حقیقی مالک ہیں اور تعلیم کے راستے سے ہی ملک کو ترقی یافتہ بنائیں گے ،ہمیں ملک کو ایسا پاکستان بنانا ہے جس کے لیے ہمارے آبائو اجداد نے قربانیاں دی تھیں،ہم دین کی بنیاد پر ملک کا نظام قائم کرنا چاہتے ہیں، جس میں سب کے لیے عدل کا ایک ہی نظام ہوگا،امیر اور غریب سب کے لیے یکساں نظام تعلیم ہوگا، ایک نظام، ایک نصاب،ایک معیار 25 کروڑ لوگوں حق ہے ،کراچی کے طلبہ کے ساتھ فیسوں کی وصولی میں زیادتی کی جارہی،کراچی اور سندھ یونیورسٹی کے طلبہ کی فیسوں میں زمین و آسمان کا فرق ہے ،کراچی کے طلبہ سے بھی اتنی ہی فیس لی جائے جتنی سندھ یونیورسٹی کے طلبہ سے وصول کی جارہی ہے ۔بنوقابل ایپٹی ٹیوٹ ٹیسٹ 4.0سے سابق گورنر اسٹیٹ بینک ڈاکٹر عشرت حسین، سی ای او الخدمت نوید علی بیگ، امیرجماعت اسلامی ضلع شرقی نعیم اختر و دیگر نے بھی خطاب کیا۔
حافظ نعیم کے خطاب سے قبل قائدین کے ہمراہ ہزاروں طلبہ و طالبات نے کھڑے ہوکر قومی ترانہ پڑھا۔حافظ نعیم نے مزیدکہاکہ اگر حکومت و ریاست عوام کو تعلیم نہیں دے رہی تو ہم پر فرض ہے ایسے لوگوں کو اپنے سروں سے ہٹادیں جو ہمارے ہی ٹیکسوں کا پیسہ ہم پر خرچ نہیں کرتے ۔ نوجوان طلبہ و طالبات آئی ٹی کورسز مکمل کریں اور پھر دوسروں کو فری کورسز کرائیں۔ ان کا کہنا تھا کہ منظم طریقے سے نوجوانوں کو مایوس کیا اور بتایا جارہا ہے کہ پاکستان میں کچھ نہیں، ہمارے نوجوان باہر کیوں جائیں، نوجوان ملک پر اعتماد کریں، یہ ہمارا ملک ہے ، ہم ہی اس کو سنواریں گے ، چند ہاتھوں سے نکال کر مجبوروں، محروموں اور مظلوموں کے ہاتھ میں اس ملک کی باگ ڈور دیں گے ، ہمارا انقلاب پر امن، نوجوان تعلیمی میدان میں آگے بڑھیں اور جماعت اسلامی کا دست و بازو بنیں۔
