پاک بحریہ، میری ٹائم سکیورٹی کی ایرانی جہاز کیساتھ مشق
اسلام آباد(خصوصی نیوز رپورٹر)خلیج عرب میں تعیناتی کے دوران پاک بحریہ کے جہاز رسدگار، عظمت اور پاکستان میری ٹائم سکیورٹی ایجنسی کے جہاز دشت نے ایران کی بندرگاہ بندر عباس کا دورہ کیا۔
قیادت پاک بحریہ کے کموڈور محمد عمیر کر رہے تھے ۔ ترجمان پاکستان نیوی کے مطابق میزبان ملک کی بندرگاہ پر آمد کے موقع پر پاکستانی سفارتخانے کے نمائندوں اور ایران کی بحریہ کے حکام نے جہازوں کا پرتپاک استقبال کیا۔ مشن کمانڈر نے جہازوں کے کمانڈنگ آفیسرز کے ہمراہ ایرانی بحریہ کی بحری قیادت سے ملاقاتیں کیں۔ ملاقاتوں کے دوران باہمی دلچسپی کے امور اور میری ٹائم سکیورٹی میں تعاون، بحری افواج کے مابین رابطے اور میری ٹائم سکیورٹی میں تعاون پر تبادلہ خیال کیا گیا۔ بندرگاہ کے دورے کی تکمیل پر پاک بحریہ ،پاکستان میری ٹائم سکیورٹی ایجنسی کے جہازوں نے ایرانی بحریہ کے جہاز کے ساتھ مشق کی ، مشق کا مقصد بحری افواج کے درمیان باہمی تعاون کو بہتر بنانے کے ساتھ ساتھ مربوط مشقوں کے ذریعے بحری افواج کے مابین مشترکہ آپریشنز کی صلاحیت کو فروغ دینا تھا ۔
