وزیراعظم ای آفس احکامات پر عملدرآمد نہ ہونے پر بر ہم ، رپورٹ طلب
اسلام آباد (حریم جدون)وزیراعظم شہباز شریف نے ای آفس پر عملدر آمد نہ ہونے پر سخت برہمی کا اظہار کردیا ،وزیراعظم کی بار بار ہدایت کے باوجود وفاقی وزارتوں اور ڈویژنز کی عدم دلچسپی کے باعث ای آفس کے احکامات پر تعمیل نہ ہوسکی۔
وزیراعظم نے وفاقی حکومت سے ای آفس پر عملدرآمد نہ ہونے پر سخت برہمی کا اظہار کرتے ہوئے وزارتوں کے مابین خط و کتابت کیلئے ای آفس کو لازمی قرار دے دیا ،وزیراعظم آفس نے ای آفس کے نفاذ پر تمام وزارتوں، ڈویژنز کو ایک بار پھر مراسلہ ارسال کردیا، جس میں سخت ہدایات جاری کی گئی ہیں۔مراسلہ میں کہا گیا ہے کہ تمام وزارتوں کے مابین خط و کتابت کو ای آفس کے ذریعے یقینی بنایا جائے ، مراسلہ میں فزیکل کمیونی کیشن کو مستر د کرکے ای آفس کے ذریعے خط و کتابت کو دوبارہ جمع کرانے کی ہدایت کی گئی ہے ۔وزیراعظم آفس کی جانب سے جاری مراسلہ میں مزید کہا گیا ہے کہ وزارت آئی ٹی اور این آئی ٹی بی ای آفس کے استعمال پر جامع رپورٹ تیار کرکے جمع کرائیں، رپورٹ میں وزارتوں میں ای آفس کی تعمیل سے متعلق تفصیلی اعدادوشمار شامل ہونے چاہئیں۔
