ہماری پالیسی صرف پاکستان،ریاست ہے تو سیاست بھی ہے،غلطیوں سے سبق نہ سیکھنا بڑی غلطی:آرمی چیف

ہماری پالیسی صرف پاکستان،ریاست ہے تو سیاست بھی ہے،غلطیوں سے سبق نہ سیکھنا بڑی غلطی:آرمی چیف

اسلام آباد،راولپنڈی (خصوصی نیوز رپورٹر) آرمی چیف جنرل سید عاصم منیر نے کہا ہے کہ ہماری پالیسی صرف اور صرف پاکستان ہے ،ریاست ہے تو سیاست ہے ،غلطیوں سے سبق نہ سیکھنا بڑ ی غلطی ہے ،خیبر پختونخوا میں کوئی بڑے پیمانے پر آپریشن نہیں کیا جا رہا اور نہ ہی فتنہ الخوارج کی پاکستان کے کسی بھی علاقے میں عملداری ہے۔

 صرف انٹیلی جنس کی بنیاد پر ٹارگٹڈ کارروائی کی جاتی ہے ، افغانستان سے صرف فتنہ الخوارج کی افغانستان میں موجودگی اور سرحد پار سے پاکستان میں دہشت گردی پھیلانے پر اختلاف ہے اور اس وقت تک رہے گا جب تک وہ اس مسئلے کو دور نہیں کرتے ۔پشاور میں خیبر پختونخوا کے سیاسی قائد ین سے ملاقات میں بات چیت کرتے ہوئے آرمی چیف نے کہاکہ افغانستان ہمارا برادر پڑوسی اسلامی ملک ہے اور پاکستان افغانستان سے ہمیشہ بہتر تعلقات کا خواہاں رہا ہے ۔ عوام اور فوج کے درمیان ایک خاص رشتہ ہے ،اس رشتے کو ختم کرنے کا بیانیہ بیرون ملک سے مخصوص ایجنڈے کے ذریعے چلایا جاتا ہے ۔ان کا کہناتھاکہ کیا فساد فی الارض اللہ کے نزدیک ایک بہت بڑا گناہ نہیں ہے ؟، جنرل عاصم منیر نے کہا کہ ریاست ہے تو سیاست ہے ،خدا نخواستہ ریاست نہیں تو کچھ بھی نہیں۔ ہم سب کو بلا تفریق اور تعصب، دہشت گردی کے خلاف یک جا کھڑا ہونا ہوگا، جب ہم متحد ہو کر چلیں گے تو صورتِ حال جلد بہتر ہو جائے گی،نیشنل ایکشن پلان پر سب پارٹیوں کا اتفاق حوصلہ مند ہے مگر اس پر تیزی سے کام کرنا ہوگا۔

آرمی چیف کا کہنا تھا کہ انسان خطا کا پتلا ہے ، ہم سب غلطیاں کرتے ہیں لیکن ان غلطیوں کو نہ ماننا اور ان سے سبق نہ سیکھنا اُس سے بھی بڑی غلطی ہے ۔دریں اثنا بنگلہ دیش کی مسلح افواج ڈویژن کے پرنسپل سٹاف آفیسر لیفٹیننٹ جنرل ایس ایم قمر الحسن نے چیف آف آرمی سٹاف جنرل سید عاصم منیر سے ملاقات جی ایچ کیوراولپنڈی میں ملاقات کی اور خطے میں ابھرتی ہوئی سلامتی کی صورتحال اور دوطرفہ تعلقات سمیت دیگر امور پر تبادلہ خیال کیا۔ آئی ایس پی آر کے مطابق ملاقات میں دوطرفہ فوجی تعاون کو بڑھانے اور اس کیلئے مزید راستے تلاش کرنے پر غور کیا گیا جبکہ دونوں جانب سے مضبوط دفاعی تعلقات کی اہمیت پر زور دیتے ہوئے دونوں برادر ممالک کے درمیان پائیدار شراکت داری پر اتفاق کیا گیا اور اس کے حوالے سے بیرونی اثرات کے خلاف پر عزم رہنے پر اتفاق کیا گیا۔ بنگلہ دیشی وفد نے راولپنڈی میں چیئرمین جوائنٹ چیف اف سٹاف کمیٹی جنرل ساحر شمشاد مرزا سے بھی ملاقات کی،ملاقات میں بھی دونوں جانب سے باہمی دفاعی تعلقات کا جائزہ لیا گیا اور اس شعبے میں تعاون اور تعلقات کو فروغ دینے کے مواقعوں پر تبادلہ خیال کرتے ہوئے ان تعلقات کو مضبوط، مستحکم اور دیرپا بنانے پر اتفاق کیا گیا۔

روزنامہ دنیا ایپ انسٹال کریں