سندھ اربوں فنڈ سے سڑکیں نہیں بنا سکتا تو اللہ حافظ،عظمیٰ بخاری
لاہور (دنیا نیوز)صوبائی وزیر اطلاعات پنجاب عظمیٰ بخاری نے کہا ہے کہ اگر سندھ اربوں کے فنڈز سے اپنی سڑکیں نہیں بنا سکتا تو پھر آپ کا اللہ ہی حافظ ہے۔
سندھ حکومت کے ترجمانوں کے بیانات پر ردعمل دیتے ہوئے لیگی رہنما عظمیٰ بخاری کا کہنا تھا پنجاب حکومت کے 90 فیصد منصوبے اپنے فنڈز سے مکمل ہو رہے ہیں، سیہون میں وزیراعلیٰ سندھ کے علاقے میں ہونے والے حادثے کو وفاق پر مت ڈالا جائے ، پچھلے 16 سال سے سندھ پر پیپلز پارٹی کی حکومت ہے مسلم لیگ ن کی نہیں۔انہوں نے کہا کہ سندھ نے جو 956 ارب کا ترقیاتی بجٹ منظور کیا تھا اللہ کرے وہ جلد از جلد لگ جائے ، مالی سال ختم ہونے والا ہے ابھی تک وزیراعلیٰ سندھ اپنے علاقے کی گلیاں، سڑکیں اور ہائی وے نہیں بنوا سکے ۔ان کا کہنا تھا ڈمپرز روزانہ کی بنیاد پر کراچی کے شہریوں کو اڑا رہے ہیں کیا وہ بھی وفاق کا مسئلہ ہے ؟ وفاق سے ہر سال معمول کے مطابق سندھ کو اس کے حصے کے فنڈز ملتے ہیں، اگر سندھ ان اربوں روپے کے فنڈز سے بھی اپنی سڑکیں نہیں بناسکتا تو پھر آپ کا اللہ ہی حافظ ہے ۔لیگی رہنما نے کہا کہ وفاق اور صوبوں کے معاملات میں چچا بھتیجی کے رشتے کا کیا تعلق اور اس کا حوالہ کیوں ؟ مریم نواز پنجاب میں اپنے صوبے کے وسائل سے درجنوں بڑی سڑکیں مکمل کرچکی ہیں، مراد علی شاہ واحد وزیراعلیٰ ہیں جن کو اپنے حلقے میں کام کرانے کے لیے بھی وفاق کی ضرورت پڑتی ہے ۔ان کا کہنا تھا کہ وزیراعلیٰ سندھ اپنے نئے ترجمانوں کو زمین پر بریفنگ بھی دیں، ان ناتجربہ کار ترجمانوں کو جو جھوٹی سچی پرچیاں دی جاتی ہیں یہ وہی بول دیتے ہیں، جب کارکردگی اور کام بولتے ہوں تو ترجمانوں کا لاؤ لشکر رکھنے کی ضرورت نہیں پڑتی، کارکردگی اچھی ہوتو کام بولتا ہے جیسے مریم نواز کا کام بول رہا ہے ۔
