خزانے میں 150 ارب سے زائد کا سرپلس موجود ،وزیراعلیٰ پختونخوا
پشاور(آئی این پی )وزیر اعلٰی خیبر پختونخوا علی امین گنڈاپور نے کہا کہ صوبے کی آمدن میں 50 فیصد سے زائد کا اضافہ کیا اور اس وقت خزانے میں 150 ارب روپے سے زائد کا سرپلس موجود ہے ۔
صوبے میں پوسٹنگ ٹرانسفرز میں کوئی سیاسی دبا ؤقبول نہیں کیا جائے گا،وزیر اعلٰی کی زیر صدارت صوبائی کابینہ کا 27 واں اجلاس ہوا جس میں خیبر پختونخوا جوڈیشل افسران ویلفیئر فنڈ کے قیام کے لیے ڈرافٹ بل،ریگی ماڈل ٹاؤن میں جوڈیشل اکیڈمی کے قیام کے لیے فنڈز کی منظوری دی گئی ۔ صوبائی محتسب سیکرٹریٹ میں پوسٹوں کی تخلیق کے لیے پابندی میں نرمی کا فیصلہ کیا گیا۔خیبر پختونخوا ٹریڈ ٹیسٹنگ بورڈ ڈرافٹ بل 2025 اور نیشنل گیمز میں شرکت کرنے والے کھلاڑیوں کے لیے فنڈز کی منظوری دی گئی۔ گنڈاپور نے کہا کہ اقتدار سنبھالا تو خزانے میں صرف 15 دن کی تنخواہ کے پیسے تھے لیکن اب خزانے میں 150 ارب روپے سے زائد کا سرپلس پڑا ہے ۔
