سپریم کورٹ رولز2025کا مسودہ تیار،ڈیجیٹلائزیشن،خود کار نظام کی سفارش
اسلام آباد(کورٹ رپورٹر،مانیٹرنگ ڈیسک)چار رکنی ججزکمیٹی نے سپریم کورٹ رولز 2025 کا مسودہ تیار کر لیا،نئے رولز کا مسودہ چیف جسٹس پاکستان سمیت دیگر ججز کو بھجوا دیا گیاہے ،
سپریم کورٹ اعلامیہ کے مطابق مجوزہ رولز کا جائزہ لینے کے بعد فل کورٹ سے حتمی منظوری لی جائے گی،چیف جسٹس کی ہدایت پر سپریم کورٹ رولز 1980 کے جائزے کیلئے جسٹس شاہدوحیدکی سربراہی میں چار رکنی کمیٹی تشکیل دی گئی تھی، کمیٹی میں جسٹس عرفان سعادت، جسٹس نعیم افغان اور جسٹس عقیل عباسی شامل تھے ۔اعلامیہ کے مطابق سپریم کورٹ کے رولز میں ڈیجیٹلائزیشن اور خودکار نظام متعارف کرانے کی سفارش کی گئی، عدالتی امور میں بہتری کیلئے بار کونسلز اور ججز سے تجاویز طلب کی گئیں،اعلامیہ کے مطابق رولز کا مسودہ چیف جسٹس اور سپریم کورٹ کے ججز کو مزید غور و خوض کیلئے پیش کر دیا گیا۔ اعلامیہ کے مطابق انصاف کی فوری اور شفاف فراہمی کیلئے سپریم کورٹ میں نئی اصلاحات متعارف کروائی جائیں گی۔
