میڈیکل کالجز اورڈینٹل کالجز میں 90فیصد حاضری لازمی قرار
لاہور(اپنے سٹاف رپورٹر سے ) میڈیکل اور ڈینٹل کالجز میں 90 فیصد حاضری لازمی قراردے دی گئی جبکہ فرسٹ ائیر میں پاس مارکس بھی 70 فیصد کردئیے گئے۔
یونیورسٹی آف ہیلتھ سائنسز (یو ایچ ایس)کی سنڈیکیٹ کا 85واں اجلاس گزشتہ رو ز ہوا جس کی صدارت وائس چانسلر پروفیسر ڈاکٹر احسن وحید راٹھور نے کی۔ اجلاس میں میڈیکل اور ڈینٹل کالجوں کے طلبہ کیلئے پاکستان میڈیکل اینڈ ڈینٹل کونسل کی ہدایت کے مطابق کم از کم 90 فیصد حاضری اور 70 فیصد پاس مارکس کی شرائط لاگو کرنے کی منظوری دی گئی،90 فیصد سے کم حاضری پر امیدوار کو سالانہ امتحانات میں بیٹھنے کی اجازت نہیں ہوگی جبکہ پروفیشنل امتحان پاس کرنے کیلئے امیدوار کو کم ازکم 70 فیصد نمبر حاصل کرنے ہوں گے ۔یہ شرائط سیشن2024-25میں داخل ہونے والی ایم بی بی ایس اور بی ڈی ایس فرسٹ ائیر کی نئی کلاسز پر لاگو ہوں گی، پہلے سے پڑھنے والے طلبہ پر ان کا اطلاق نہیں ہوگا۔ فی الوقت میڈیکل اور ڈینٹل کالجوں میں کم از کم لازمی حاضری 85 فیصد جبکہ پاسنگ مارکس 50 فیصد ہیں۔اجلاس میں یو ایچ ایس فنانس اینڈ پلاننگ کمیٹی کیلئے سنڈیکیٹ کے رکن کے طور پر ڈاکٹر زاہد پرویز کو نامزد کرنے کی منظوری بھی دی گئی۔ نوٹیفکیشن کے مطابق دو پرائیویٹ میڈیکل کالجز سہارا میڈیکل کالج نارووال اور شریف میڈیکل کالج لاہور کی ایم بی بی ایس نشستوں میں اضافہ کرتے ہوئے 100 سے بڑھا کر 150 کر دی گئیں ۔
