پاکستان کو دوسرے ٹی 20 میں بھی کیویز کے ہاتھوں شکست
ڈونیڈن (سپورٹس ڈیسک )دوسرے ٹی ٹونٹی میچ میں بھی کیویز نے پاکستان کو 5 وکٹوں سے شکست دے دی۔گرین شرٹس اور نیوزی لینڈ کے درمیان جاری 5 میچز پر مشتمل ٹی ٹونٹی سیریز کا دوسرا ٹی ٹونٹی میچ ڈونیڈن میں کھیلا گیا۔۔
بارش کی وجہ سے ٹاس اور میچ اپنے مقررہ وقت کے بجائے تاخیر سے شروع ہوا۔نیوزی لینڈ نے پاکستان کے خلاف ٹاس جیت کر فیلڈنگ کا فیصلہ کیا تاہم بارش کے باعث 5، 5 اوورز کم کر کے میچ کی فی اننگز 15 اوورز کی کر دی گئی۔پاکستان نے نیوزی لینڈ کو جیت کیلئے 136 رنز کا ہدف دیا جسے کیوی ٹیم نے باآسانی عبور کر لیا۔نیوزی لینڈ کے خلاف پاکستان کا آغاز اچھا نہ رہا اور پہلی وکٹ ایک رن پر گری جس میں اوپنر حسن نواز صفر پر آؤٹ ہو گئے ، اس کے بعد محمد حارث بھی زیادہ دیر پچ پر نہ ٹھہر سکے اور 19 کے مجموعے پر 11 رنز بنا کر پویلین لوٹ گئے ۔پاکستان کی تیسری وکٹ 50 رنز پر گری اور عرفان خان 11 رنز بنا کر آؤٹ ہوئے جبکہ تیسری کے بعد چوتھی وکٹ 52 رنز پر گری جس میں خوشدل شاہ صرف 2 رنز بنا کر چلتے بنے ۔پاکستان کی پانچویں وکٹ 76 رنز پر گری اور کپتان سلمان آغا 28 گیندوں پر 46 رنز بناکر آؤٹ ہو گئے جس کے بعد شاداب نے 14 گیندوں پر 26 رنز بنائے اور 110 کے مجموعے پر وکٹ گنوا بیٹھے ۔ ساتویں وکٹ 111 رنز پر گری اور جہانداد خان صفر پر آؤٹ ہو گئے ، آٹھویں وکٹ 114 رنز پر گری، عبدالصمد 11 رنز بنا سکے ، نویں وکٹ 135 رنز پر گری اور حارث رؤف ایک رن بنا کر رن آؤٹ ہو گئے ،اس طرح قومی ٹیم نے 15 اوورز میں نیوزی لینڈ کو جیت کے لیے 136 رنز کا ہدف دیا۔ہدف کے تعاقب میں پاکستان کے خلاف نیوزی لینڈ کی پہلی وکٹ 66 رنز پر گری، ٹم سائفرٹ 45 رنز بنا کر آؤٹ ہوئے ، دوسری وکٹ 87 رنز پر گری، جب فن ایلن 38 رنز بنا کر آؤٹ ہو گئے ،نیوزی لینڈ کی تیسری وکٹ 91 رنز پر گری، جب نیوزی لینڈ کے کھلاڑی مارک چیپمین ایک رن بنا کر آوٹ ہوئے ، چوتھی وکٹ جمی نیشم کی 97 رنز پر گری، جب جمی 5 رنز بنا کر آؤٹ ہو گئے ۔پاکستان کے خلاف نیوزی لینڈ کی پانچویں وکٹ 132 رنز پر گری، اس موقع پر ڈیرل مچل 14 رنز بنا کر آؤٹ ہوئے ۔پاکستان کی جانب سے ملنے والا 136رنز کا ہدف نیوزی لینڈ نے 13.1 اوورز میں 5 وکٹ پر حاصل کیا۔میزبان ٹیم کے اوپنر ٹم سائفرٹ 45 رنز بنا کر نمایاں رہے ، اوپنر ٹم سائفرٹ نے اننگز میں 5 چھکے اور 3 چوکے لگائے ۔فن ایلن نے 16 گیندوں پر 38 رنز بنائے جس میں 5 چھکے اور 1 چوکا شامل ہے ۔پاکستانی بولر حارث رؤف نے 2، محمد علی، خوشدل شاہ اور جہانداد خان نے ایک ایک وکٹ حاصل کی۔ قومی ٹیم میں ایک تبدیلی کی گئی تھی، سپنر ابرار احمد کی جگہ حارث رؤف کو ٹیم میں شامل کیاگیاتھا،پاکستان اور نیوزی لینڈ کے درمیان سیریز کا تیسرا ٹی ٹونٹی میچ جمعے کو آکلینڈ میں کھیلا جائے گا۔
