بھٹوکو نشان پاکستان ملنا نظرئیے کی ایک اور فتح : بلاول
اسلام آباد(مانیٹرنگ ڈیسک)پیپلز پارٹی کے چیئرمین بلاول بھٹو زرداری نے شہید ذوالفقار علی بھٹو کو بعد از شہادت نشانِ پاکستان کا اعزاز ملنے کو تاریخ کا اہم سنگِ میل قرار دیا ہے۔
بلاول بھٹو زرداری کااپنے پیغام میں کہنا تھا کہ پاکستان کے پہلے منتخب وزیرِاعظم اور آئینِ پاکستان کے خالق کو اعلیٰ ترین سول اعزاز ملنا بھٹوازم کے نظرئیے کی ایک اور فتح ہے ، یہ اعزاز شہید ذوالفقار علی بھٹو کی ملک کیلئے گراں قدر خدمات کا باضابطہ اعتراف ہے ۔ قائدِ عوام نے پاکستانی عوام کو حقوق کیلئے جدوجہد کا شعور دیا اور ہمیشہ جمہوریت کے فروغ کیلئے کام کیا۔انہوں نے کہا کہ وقت کے آمر نے فخرِ ایشیا شہید ذوالفقار علی بھٹو کی آواز دبانے کی کوشش کی لیکن وہ آج بھی گڑھی خدا بخش سے راج کر رہے ہیں، پاکستان پیپلز پارٹی بھٹوازم کی پیروکار ہے اور ہمیشہ اپنے شہید بانی کے مشن پر کاربند رہے گی۔
