نیپرا کا بجلی کی کھپت میں کمی پر تشویش کا اظہار
اسلام آباد (نامہ نگار، این این آئی) نیپرا نے بجلی کی کھپت میں کمی پر تشویش کا اظہار کیا ہے ،سی پی پی اے نے فی یونٹ بجلی 30پیسے سستی کرنے کی درخواست کر دی۔
فروری کی ماہانہ فیول پرائس ایڈجسٹمنٹ کی درخواست پر نیپرا میں سماعت ہوئی، جس میں سینٹرل پاور پرچیزنگ ایجنسی نے فی یونٹ بجلی 30 پیسے سستی کرنے کی درخواست کی۔سی پی پی اے کے مطابق ایل این جی کے نرخوں میں کمی ہونے سے بجلی کی قیمت کم ہو رہی ہے ۔سماعت میں بجلی کی کھپت میں کمی سے متعلق نیپرا نے تشویش کا اظہار کیا ،ممبر ٹیکنیکل رفیق شیخ نے سوال کرتے ہوئے کہا کہ مستقبل میں بجلی کی گروتھ کیاہوگی،کوئی اسٹڈی ہے ؟اس حوالے سے سی پی پی اے نے موقف اپنایا کہ ڈسکوز کی سطح پر سٹڈی کرائی جا رہی ہیں، ڈیموں میں پانی کی کمی پر مہنگے ذرائع سے بجلی پیداوار بڑھ سکتی ہے ۔سماعت میں ممبر نیپرا رفیق شیخ نے کہا کہ آج ڈسکوز کو یہاں ہونا چاہیے تھا، ترسیلی نقصانات کے باعث صارفین پر کتنا بوجھ پڑا ہے ؟۔چیئرمین نیپرا نے کہا کہ ملک میں بجلی کی طلب میں کمی پر پاور ڈویژن سٹڈی کرائے ، پن بجلی کی گرتی ہوئی صورتحال کے تناظر میں پلان تیار کیا جائے ۔فروری کی فیول پرائس ایڈجسٹمنٹ کیلئے سماعت مکمل ہونے پر فیصلہ محفوظ کر لیا گیا ہے جو بعد میں جاری کیا جائے گا۔ نیپرا حکام نے کہاکہ فروری میں میرٹ آرڈر کی خلاف ورزی سے ایک ارب 89 کروڑ روپے کا بوجھ پڑا ۔
