سندھ ہائیکورٹ کے جسٹس آغا فیصل کیخلاف ریفرنس دائر
کراچی (سٹاف رپورٹر)سپریم جوڈیشل کونسل میں سندھ ہائی کورٹ آئینی بینچ کے جسٹس آغا فیصل کے خلاف ریفرنس دائر کردیا گیا ۔
سندھ ہائی کورٹ کے وکیل عثمان فاروق ایڈووکیٹ کے دائر ریفرنس میں مؤقف اختیار کیاگیاہے کہ جسٹس آغا فیصل معمولی تاخیر پر بھی عدم پیروی کی بنا پر درخواستیں مسترد کرتے ہیں، 2020 میں جسٹس آغا فیصل نے بورڈ ڈسچارج کرکے اسکول کے طلبا کو کمرہ عدالت کا دورہ کرایا، اسکول کے طلبا نے ججز کی کرسیوں پر بیٹھ کر تصاویر بنوائیں،جسٹس آغا فیصل کی جانب سے قانونی دلائل اور کیس فائل کو نظر انداز کرتے ہوئے کیسز نمٹائے جارہے ہیں،جسٹس آغا فیصل کی جانب سے عدالتی اختیارات کا بے جا استعمال کرتے ہوئے بڑی تعداد میں وارنٹ جاری کئے جارہے ہیں،ان کی جانب سے درخواستیں مسترد کئے جانے کی تفصیلی وجوہات سے آگاہ نہیں کیا جارہا،جسٹس آغا فیصل کی جانب سے درخواستوں کی باقاعدہ سماعت کا موقع دئیے بغیر درخواستیں مسترد کی جارہی ہیں، فیئر ٹرائل کا موقع نہ دینا آئین کے آرٹیکل 10اے کی خلاف ورزی ہے ، عدالتی کارروائی میں امتیاز برتنا آئین کے آرٹیکل 25اے کی خلاف ورزی ہے ، فاضل جج کا رویہ کوڈ آف کنڈیکٹ کی خلاف ورزی ہے ،سپریم جوڈیشل کونسل جسٹس آغا فیصل کے مس کنڈکٹ کے خلاف کارروائی کرے ،جسٹس آغا فیصل کو عدالتی کارروائی کے فرائض کی انجام دہی سے روکا جائے ،درخواست گزار کی مسترد کی گئی درخواستوں پر نظر ثانی کے احکامات جاری کئے جائیں۔
