امارات کے وزیر خارجہ وفد کے ہمراہ پاکستان پہنچ گئے
اسلام آباد (دنیا نیوز) متحدہ عرب امارات کے وزیرخارجہ شیخ عبداللہ بن زید اعلیٰ سطح وفد کے ہمراہ پاکستان پہنچ گئے ،وزیر خارجہ اسحاق ڈار نے ان کا استقبال کیا، اماراتی وزیر خارجہ دو روزہ دورے پاکستان پر آئے ہیں۔
ترجمان دفتر خارجہ کے مطابق اماراتی وزیرخارجہ کااعلیٰ سطح دورہ پاکستان اور متحدہ عرب امارات کے درمیان گہرے ، برادرانہ تعلقات کی عکاسی کرتا ہے اور باہمی دلچسپی کے تمام شعبوں میں دوطرفہ تعاون کو مضبوط بنانے کے لیے دونوں ممالک کے مشترکہ عزم کو اجاگر کرتا ہے ۔ اپنے دورے کے دوران شیخ عبداللہ بن زید النہیان پاکستان کے نائب وزیراعظم ، وزیر خارجہ سے بات چیت کریں گے ، دوطرفہ تعلقات کے تمام پہلوؤں کا جائزہ لیا جائے گا جس میں تجارت اور سرمایہ کاری، توانائی تعاون، علاقائی سلامتی اور عوام سے عوام کے روابط پر خصوصی توجہ دی جائے گی۔ یہ دورہ دونوں فریقین کو باہمی دلچسپی اور تشویش کی علاقائی اور عالمی پیش رفت پر تبادلہ خیال کرنے کا موقع بھی فراہم کرے گا۔ نائب وزرائے اعظم کی آخری ملاقات 21 فروری 2025 کو ابوظہبی میں ہوئی تھی۔شیخ عبداللہ وزیر اعظم پاکستان شہباز شریف سے بھی ملاقات کریں گے ۔
یہ کال خطے میں امن اور خوشحالی کے مشترکہ وژن کی توثیق کرے گی۔ شیخ عبداللہ بن زید النہیان کے دورہ سے دونوں ممالک کے عوام کو فائدہ پہنچے گا۔ دوسری طرف روانڈا کے وزیر خارجہ اولیورجین پیٹرک ندوہنگرے بھی پاکستان پہنچ گئے ہیں۔ اسلام آباد ایئرپورٹ پر دفترخارجہ کے حکام اورروانڈا کے ہائی کمشنر نے وزیر خارجہ اولیورجین پیٹرک ندوہنگرے کا استقبال کیا۔ ترجمان دفتر خارجہ کے مطابق روانڈا کے وزیر خارجہ وزیراعظم شہبازشریف اور نائب وزیراعظم اسحاق ڈار سے ملاقاتیں کریں گے ، چیئرمین سینیٹ، وفاقی وزراء سے بھی ملاقاتیں شیڈول ہیں۔ مہمان وزیر خارجہ اسلام آباد میں روانڈا کے ہائی کمیشن کا باقاعدہ افتتاح بھی کریں گے، اولیورجین پیٹرک ندوہنگرے تاجروں سے بھی بات چیت کریں گے۔ یہ دورہ کیگالی اور اسلام آباد میں متعلقہ سفارتی مشنز کے قیام کے بعد جمہوریہ روانڈا کے وزیر خارجہ کا پہلا سرکاری دورہ ہے، جس سے دونوں دوستانہ ممالک کے درمیان تعاون کے نئے مواقع پیدا ہوں گے۔ اماراتی وزیرخارجہ یو اے ای کے وزیر خارجہ شیخ عبداللہ 2 روزہ دورے پر اسلام آباد پہنچ گئے نائب وزیراعظم و وزیرخارجہ اسحاق ڈار اور دیگر حکام نے استقبال کیا۔
