پہلگام :ایف آئی آر نے مودی ڈرامے کا پول کھول دیا
اسلام آباد(دنیا نیوز ،آئی این پی)پہلگام فالس فلیگ واقعہ کی ہندوستانی پولیس سٹیشن میں درج ہونیوالی ایف آئی آر نے مودی حکومت کا جھوٹ بے نقاب کردیا۔سکیورٹی ذرائع کے مطابق پہلگام فالس فلیگ آپریشن کی ایف آئی آر نے حملے کو مشکوک بنادیا، پہلگام پولیس سٹیشن جائے وقوع سے 6 کلومیٹر دوری پر ہے۔
ایف آئی آر کے متن کے مطابق پہلگام حملہ دوپہرایک بج کر 50منٹ سے 2بج کر 20منٹ تک جاری رہا جبکہ حیران کن طور پر صرف دس منٹ میں 2بج کر 30منٹ پر ایف آئی آر درج ہو جاتی ہے ۔10 منٹ کے اندر اندر ایف آئی آر درج ہونا پہلے سے بنے بنائے منصوبے کا اشارہ دیتی ہے ، ایف آئی آر میں پہلے سے طے شدہ منصوبے کے تحت نامعلوم سرحد پار دہشت گرد نامزد بھی ہو جاتے ہیں۔ایف آئی آر کے متن میں لکھا گیاہے کہ مبینہ دہشت گردوں کی طرف سے اندھا دھند فائرنگ کی گئی جبکہ بھارتی حکومت اورمیڈیا ٹارگٹڈ کلنگ کا جھوٹا راگ الاپتا رہا، واقعہ کے دس منٹ کے اندر اندر ایف آئی آر میں بیرونی آقاؤں کی ایما پر جیسے الفاظ پہلے سے شامل کر دئیے جاتے ہیں۔ایف آئی آر کے سامنے آنے سے مودی حکومت کا پہلگام فالس فلیگ کا بھونڈا ڈرامہ بری طرح بے نقاب ہو چکا ہے ، ایف آئی آر میں جھوٹ پکڑے جانے کے بعد مودی کا پہلگام فالس فلیگ ڈرامہ صرف ایک مذاق بن چکا ہے ۔
