مودی عالمی دہشتگرد ،جنگ مسلط کی تو انجام تک پہنچائینگے ،عظمیٰ
لاہور(اے پی پی)وزیر اطلاعات و ثقافت پنجاب عظمیٰ بخاری نے کہا ہے کہ پہلگام واقعہ سے پاکستان کا کوئی تعلق نہیں، پاکستان پرامن ملک ہے کسی سے جنگ یا حالات خراب نہیں کرنا چاہتے ،بھارتی پروازوں کی فضائی حدود کی بندش سے بھارت کو روزانہ لاکھوں ڈالر کا نقصان ہو رہا ہے۔
بھٹو شہید اورنواز شریف نے پاکستان کو ناقابل تسخیر دفاع فراہم کیا۔انہوں نے ڈی جی پی آ ر میں پریس کانفرنس میں مزید کہا مودی عالمی دہشتگرد ہے ، اقتدار میں آتا ہے تو ناصرف پاکستان بلکہ دنیا میں بھی حالات خراب ہوجاتے ہیں،بھارت کے خوف کا یہ عالم ہے کہ حکومت پاکستان کا ایکس اکاؤنٹ ہی بند کر دیا، واہگہ بارڈر بند کر کے بھی بھارت نے خود ہی اپنی تجارت کو نقصان پہنچایا ۔مقبوضہ کشمیر کے علاقے پہلگام میں افسوسناک واقعہ میں بیگناہ افرادکی ہلاکت پر پاکستانی قیادت نے ناصرف افسوس کا اظہار کیا بلکہ اس واقعہ کی شدید مذمت بھی کی، بغیر کسی تحقیق کے الزامات عائد کیے جا رہے ہیں۔ عظمیٰ بخاری نے کہااگر ریاست نے جہاد کا اعلان کیا تو پوری قوم سپاہی بن کر میدان میں اترے گی۔ بھارت پاکستان سے لڑنے کی صلاحیت نہیں رکھتا، جنگیں ہتھیاروں سے نہیں جذبہ شہادت سے جیتی جاتی ہیں۔
ہم پرامن قوم ہیں، کسی سے جنگ یا کشیدگی نہیں چاہتے لیکن جنگ مسلط کی گئی تو اسے منطقی انجام تک پہنچائیں گے ۔عظمیٰ بخاری نے کہا پنجاب کے عوام کیلئے دو بڑی خوشخبریاں ہیں۔ پہلی یہ کہ ایئر پنجاب کا منصوبہ مکمل ہو چکا ہے اور چار طیارے لیز پر لیکر اندرون ملک پروازوں کا آغاز کیا جا رہا ہے ، ایک سال کے اندر ائیر لائن کو بین الاقوامی پروازوں کا لائسنس مل جائے گا ۔ دوسری خوشخبری یہ ہے کہ پاکستان کی پہلی بلٹ ٹرین کا آغاز لاہور سے راولپنڈی تک کیا جا رہا ہے ، جو دو گھنٹے 20 منٹ میں فاصلہ طے کرے گی۔ پنجاب بھر میں مزید بلٹ ٹرین روٹس بنائے جائینگے ، راولپنڈی سے مری تک "گلاس ٹرین"چلائی جائے گی۔ ریلوے کی بحالی کیلئے محکمہ سے ملکر کام کیا جائے گا۔ ایک سوال پر انہوں نے کہا سندھ طاس معاہدہ چائے کا ٹھیلہ یا پکوڑے کی دکان نہیں جسے مودی مرضی سے بند کر سکے ،صنم جاوید جیسے افراد پر وقت ضائع کرنے کی بجائے قوم کو یکجہتی کی ضرورت ہے ۔ سیاسی جماعتیں اپنا محاسبہ کریں اور سطحی بیانات سے گریز کریں۔
