علیمہ خان کیخلاف گفتگو کی ویڈیو لیک
لاہور،اسلام آباد (مانیٹرنگ ڈیسک، خصوصی نیوز رپورٹر) پی ٹی آئی رہنما کنول شوزب کی بانیٔ پی ٹی آئی کی بہن کے خلاف گفتگو کی ویڈیو لیک ہو گئی۔
پارٹی رہنماؤں کی آن لائن میٹنگ کی کنول شوزب کی ویڈیو لیک ہوئی ہے جس میں ان کا کہنا ہے کہ پی ٹی آئی ہماری فیملی ہے ، بہت افسوس ہوا جب علیمہ خان نے کہا کہ کون گوہر؟،لیک ویڈیو میں کنول شوزب نے کہا ہے کہ اگر تنظیم کے عہدوں کی فکر نہیں ہو گی تو پارٹی کی عزت کون کرے گا؟ کوئی کون ہوتا ہے کسی کو منشی کہنے والا؟ کنول شوزب لیک ویڈیو میں یہ کہتی دکھائی دے رہی ہیں کہ مجھے جب بھی علیمہ آپا ملیں گی تو میں ان سے لڑوں گی، پوچھوں گی، علیمہ آپا کو کہوں گی کہ یا توسیاست میں آنے کا اعلان کریں یا پارٹی کو برباد نہ کریں۔ اپنے ردعمل میں کنول شوزب نے کہا پارٹی کے اندرونی معاملات کو پبلک کرنے سے پارٹی کمزور ہو گی، پارٹی کے اندرونی معاملات کو پبلک میں لایا گیا جو کہ تشویش ناک ہے ۔ گفتگو بیرسٹر گوہر سے متعلق نہیں شہباز شریف کے بارے میں ہے ، میری گفتگو کو مختلف معنی میں لیا جا رہا ہے۔
