بھارت نے پاکستان پر الزامات کے ثبوت نہیں دکھائے :برطانیہ
اسلام آباد (نامہ نگار،مانیٹرنگ ڈیسک ،نیوز ایجنسیاں)پاکستان کے دورے پر آئے برطانوی وزیر خارجہ ڈیوڈ لیمی کا کہنا ہے کہ بھارت نے پہلگام واقعہ سے متعلق پاکستان پر لگائے گئے الزامات کے کوئی ثبوت نہیں دکھائے ،یہ توقع بھی نہیں کہ بھارت اپنی قومی سلامتی کا معاملہ برطانیہ سے شیئر کرے گا۔
ڈیوڈ لیمی نے کہا کہ پہلگام میں دہشت گرد حملہ خوفناک تھا، برطانیہ ہر قسم کی دہشت گردی کی مذمت کرتا ہے ، ہمیں متاثرین سے ہمدردی ہے ۔ پاکستان بھی دہشت گردی کا شکار رہا ہے ، ہمیں اس بات کو یقینی بنانا ہے کہ انتہا پسندی کو فروغ نہ ملے ۔پاکستان کے دورے پر آئے ڈیوڈلیمی نے گزشتہ روز وزیراعظم شہباز شریف سے ملاقات کی ۔ وزیر اعظم نے کہا کہ بھارتی جارحیت پراپنے دفاع کے حق کے استعمال میں پاکستان کا ردعمل کی متناسب اہداف پر مبنی تھا۔ انہوں نے پاکستان اور برطانیہ تعلقات کی مثبت رفتار پر اطمینان کا اظہار کیا اور تمام شعبوں میں دوطرفہ تعاون کو بڑھانے کی اپنی خواہش کا اعادہ کیا۔ڈیوڈ لیمی کا کہناتھاکہ برطانیہ خطے میں امن و استحکام کے فروغ کیلئے تعمیری کردار کرتا رہے گا۔دریں اثنا ڈیوڈ لیمی نے نائب وزیر اعظم اور وزیر خارجہ اسحاق ڈار سے ملاقات کی۔ترجمان دفتر خارجہ کے مطابق اسحاق ڈار اور برطانوی وزیر خارجہ کے درمیان جنوبی ایشیا کی صورتحال اور جنگ بندی کے بعد کی پیشرفت پرگفتگو ہوئی جس میں اسحاق ڈار نے بھارت کی اشتعال انگیز کارروائیوں سے آگاہ کیا۔ دونوں جانب سے پاک برطانیہ تعلقات، تجارت اور ترقیاتی شراکت داری پر اطمینان کا اظہار کیا گیا ۔ برطانوی وزیر خارجہ کاکہناتھاکہ پاکستان اوربھارت کی قیادت نے جنگ بندی کے حوالے سے متاثر کن کردار ادا کیا، جنگ بندی برقرار رکھنے کیلئے انٹرنیشنل پارٹنرز کے ساتھ مل کام کررہے ہیں ، پاکستان کے ساتھ باہمی تعلقات، ثقافت اور تجارت کے فروغ پر بات کروں گا۔انہوں نے کہاکہ پاک بھارت کشیدگی کا براہ راست اثر برطانیہ میں آباد دونوں ممالک کے افراد پر پڑتا ہے ،برٹش پاکستانی کمیونٹی کے اس قدر تحفظات تھے کہ پاکستان ہائی کمیشن کو 2 ہزار سے زائد کالز موصول ہوئی تھیں۔ڈیوڈ لیمی نے جنگ بندی کا خیرمقدم کرتے ہوئے واضح کیا کہ تنازعہ کسی کے مفاد میں نہیں ہے دونوں ممالک برطانیہ کے اہم شراکت دار ہیں۔ برطانوی ہائی کمیشن نے ڈیوڈ لیمی کے دورہ پاکستان پر اعلامیہ میں کہاکہ 2011 کے بعد کسی برطانوی سیکرٹری خارجہ نے پہلی بار پاکستان کا دورہ کیا ہے ۔
