جمہوریت کیلئے مکالمے کا فروغ وقت کی اہم ضرورت :صدر
لاہور (سپیشل رپورٹر)صدر آصف علی زرداری کی لاہور میں تیسرے روز بھی سیاسی و سماجی شخصیات اور مختلف طبقہ ہائے زندگی کے نمائندہ وفود سے ملاقاتوں کا سلسلہ جاری رہا۔
گورنر ہاؤس لاہور میں پیپلز پارٹی جنوبی پنجاب کے چودھری ذکا اشرف، ممتاز علی چانگ، مخدوم شہاب الدین اور رکن قومی اسمبلی مخدوم طاہر پر مشتمل وفد سے گفتگو کرتے ہوئے صدر زرداری نے کہا ہے کہ جمہوریت کے تسلسل اور اداروں کے استحکام کے لیے باہمی ہم آہنگی اور سیاسی مکالمے کا فروغ وقت کی اہم ضرورت ہے ، عوامی مسائل کے دیرپا حل کے لئے تمام طبقات کے ساتھ مشاورت اور تعاون کے ساتھ آگے بڑھنا ہوگا۔ اس موقع پر جنوبی پنجاب کو درپیش دیرینہ مسائل اور دیگر امور پر تفصیلی تبادلہ خیال کیا گیا ۔ دریں اثناء صدر نے لاہور میں پنجاب کے وسطی اضلاع فیصل آباد، گجرات اورحافظ آباد سے تعلق رکھنے والے سابق وفاقی وزیر رانا فاروق سعید خان، تنویر اشرف کائرہ، بلال فاروق، عمر فاروق، اسامہ فاروق، علی جعفر اور حرا تنویر سے بھی ملاقات کی۔ رکن پنجاب اسمبلی انعام لالیکا، چودھری اویس، پیپلز پارٹی کے رہنما نوازش علی پیرزادہ، میاں عامر، او جی ڈی سی ایل یونین کے صدر زاہد حسین بھٹو اور مائرہ ہاشمی پر مشتمل وفد نے بھی صدر سے ملاقات کی۔ وفود سے گفتگو کرتے ہوئے آصف علی زرداری نے کہا کہ وفاق کی سطح پر تمام اکائیوں کو ساتھ لے کر چلنا، صوبوں کے ساتھ تعاون کو فروغ دینا اور شہریوں کی فلاح و بہبود کو یقینی بنانا ملکی مفاد کا تقاضا ہے ۔ الگ الگ وفود نے صدر کو اپنے اپنے اضلاع میں عوام کو درپیش مسائل سے آگاہ کیا اور نوجوانوں کی صلاحیتوں کو قومی ترقی میں بروئے کار لانے کی تجاویز بھی صدر کے سامنے رکھیں۔ صدر زرداری نے کہا کہ پاکستان کی ترقی اور استحکام کے لیے ضروری ہے کہ تمام شعبے اور تمام سیاسی و سماجی قوتیں مل کر کام کریں۔
