بلوچستان ، بڑے ملٹری آپریشن کی ضرورت نہیں:سرفراز بگٹی
کوئٹہ(سٹاف رپورٹر)وزیراعلیٰ بلوچستان سرفراز بگٹی نے کہا ہے کہ افواج پاکستان نے بھارتی جارحیت کا منہ توڑ جواب دیا، بھارت کو جنگ میں منہ کی کھانا پڑی، بھارت شکست کے بعد اب پراکسیز کا سہارا لے رہا ہے۔
بھارتی خفیہ ایجنسی ‘‘را’‘فتنہ الہندوستان کی سرپرستی کررہی ہے ، خود ساختہ لاپتہ ہونے کی شرح جبری لاپتہ ہونے سے زیادہ ہے ،بلوچستان میں کسی بڑے ملٹری آپریشن کی ضرورت نہیں۔سرفراز بگٹی نے پریس کانفرنس میں مزید کہا کہ فتنہ الہندوستان پاکستان کا امن داؤ پر لگانے کی سازش کررہا ہے ، بھارتی میڈیا نے کراچی پورٹ کے حوالے سے جعلی خبر چلائی کہ تباہ ہوگیا، بھارت ہمارے خلاف پراکسیز وار کررہا ہے ، بھارت کا شیطانی کھیل بے نقاب ہوگیا۔ سرفراز بگٹی نے دہشتگردوں کی آڈیو چلاتے ہوئے کہا ریاست کے پاس فتنہ الہندوستان کیخلاف بہت مضبوط ثبوت ہیں جنہیں مناسب پلیٹ فارم پر شیئر کیا جائے گا ،‘‘را’‘ ہینڈلرزفتنہ الہندوستان کو خفیہ معلومات فراہم کررہے ہیں۔ فتنہ الہندوستان کے ذریعے خضدار میں بچوں کو شہید کرایا گیا، انہوں نے کہا فتنہ الہندوستان کا بلوچستان سے کوئی تعلق نہیں، اسے بلوچ روایات، کلچر اور تہذیب و تمدن سے نہ جوڑا جائے ۔
