والد بچی کو ماں سے ملوانے پولینڈ لے کر جائے : جسٹس محسن
اسلام آباد(اپنے نامہ نگار سے)اسلام آباد ہائیکورٹ کے جسٹس محسن اختر کیانی نے بچی حوالگی سے متعلق پولش خاتون کی دائر درخواست پر والد کو بچی پولینڈ لے جاکر والدہ سے ملاقات کرانے کی ہدایت کردی۔
انامونیکا نامی پولش خاتون کی درخواست پرسماعت کے دوران وکیل نے عملدرآمد رپورٹ عدالت میں جمع کرائی، درخواست گزار وکیل نے کہا بچی کی والدہ نے واٹس ایپ یا دیگر آن لائن سائٹس پر ملاقات کی کوشش کی لیکن متعلقہ فریق نے حیلے بہانوں سے ویڈیو لنک پر بھی بچی سے کوئی ملاقات نہیں کرائی، وکیل صفائی نے کہاعدالت کے آرڈر کی وجہ سے میرا موکل کہیں جا نہیں سکتا،میرے موکل کا نام نو فلائی لسٹ میں شامل ہے، جسٹس محسن اختر کیانی نے کہا والد بچی کو والدہ سے ملاقات کیلئے اپنے ساتھ پولینڈ لے جائے اور ایف آئی اے بچی کے والد کو پولینڈ جانے سے نہ روکے، جسٹس محسن اخترکیانی نے کہا بچی کا والد جہاں جانا چاہے جائے مگر عدالت کو دھوکا نہیں دے سکتا،ایک کیس یہاں چل رہا ہے اور ایک کیس پولینڈ میں چل رہا، وہ ایک ماں ہے اور آپ ملاقات سے نہیں روک سکتے ،ہمیشہ سے کہتا ہوں کہ میاں بیوی کے تنازعے کا حل کوئی عدالت نہیں نکال سکتی، میاں بیوی کے تنازعے میں بچے متاثر ہوتے ہیں،عدالت نے آن لائن ملاقاتوں سے متعلق ریکارڈ پیش کرنے کی ہدایت کرتے ہوئے سماعت ستمبر تک ملتوی کر دی۔
