لیاری ،عمارت کے مالکان سمیت ایس بی سی اے کے 9افسرگرفتار
کراچی (آئی این پی )لیاری میں پانچ منزلہ رہائشی عمارت زمیں بوس ہونے پر مقدمہ درج، پولیس نے سندھ بلڈنگ کنٹرول اتھارٹی کے سینئر افسران اور متاثرہ عمارت کے مالکان کو حراست میں لے لیا۔
ذرائع کے مطابق 4 جولائی کو بغدای تھانے کے علاقے لیاری بغدادی فدا حسین شیخا روڈ پر واقع پانچ منزلہ خستہ حال رہائشی عمارت زمیں بوس ہوگئی تھی، جس کے ملبے تلے دب کر11 خواتین سمیت 27 افراد جاں بحق اور 11 افراد زخمی ہوگئے تھے ، جس کا گزشتہ روز مقدمہ درج کرلیا گیا۔ مقدمے میں سندھ بلڈنگ کنٹرول اتھارٹی کے سینئر افسران اور عمارت کے مالکان کو نامزد کیا گیا ہے ۔ جبکہ پولیس نے ایف آئی آر کو سیل کردیا ہے ۔ پولیس کی جانب سے مقدمے میں نامزد ملزموں کی گرفتاری کے لیے خصوصی ٹیمیں بھی تشکیل دیدی گئی ہیں۔ ادھر پولیس نے ایس بی سی اے کے دفتر پر چھاپہ مار کر ایک سابق سمیت 9 سینئر افسران کو پوچھ گچھ کے لیے حراست میں لے لیا، جن میں ایڈیشنل ڈائریکٹر جنرل ایس بی سی اے عرفان نقوی، زرغام شاہ، آصف رضوی، چالیس صدیقی، اشفاق کھوکھر، ڈپٹی ڈائریکٹر فہیم صدیقی، اسسٹنٹ ڈائریکٹر ذوالفقارشاہ، فہیم مرتضیٰ اور ریٹائرڈ ڈائریکٹر آصف رضوی شامل ہیں۔ پولیس کی جانب سے عمارت کے مالکان کو بھی حراست میں لیا گیا ہے ۔
