سپریم جوڈیشل کونسل کا اجلاس،ججز کیخلاف 19شکایات خارج ،5مؤخر
اسلام آباد(کورٹ رپورٹر،مانیٹرنگ ڈیسک) سپریم جوڈیشل کونسل کے اجلاس میں ججز کے خلاف چوبیس میں سے انیس شکایات خارج جبکہ پانچ موخر کردی گئیں،سپریم جوڈیشل کونسل کا اجلاس چیف جسٹس یحیی آفریدی کی زیر صدارت سپریم کورٹ عمارت میں ہوا۔
جسٹس منصور علی شاہ نے ویڈیو لنک کے ذریعے شرکت کی، اجلاس میں جسٹس منیب اختر، چیف جسٹس لاہور ہائی کورٹ عالیہ نیلم اور چیف جسٹس سندھ ہائی کورٹ جنید غفار نے بھی شرکت کی۔سپریم جوڈیشل کونسل اجلاس کے جاری اعلامیہ کے مطابق اجلاس کے دوران ایجنڈے کے تمام نکات کو ایک ایک کرکے زیر غور لایا گیا۔اعلامیے میں بتایا گیا کہ سپریم جوڈیشل کونسل سیکرٹریٹ سروس رولز 2025 کے مجوزہ مسودے کی منظوری دے دی گئی، اجلاس میں انکوائری کے طریقہ کار اور ضابطہ اخلاق میں ترامیم کو قانونی اور مسودہ نویسی کے پہلو سے مزید غور و فکر کا متقاضی قرار دیا گیا،سپریم جوڈیشل کونسل کے اعلامیے میں مزید کہا گیا کہ کونسل نے آئین کے آرٹیکل 209 کے تحت مختلف افراد کی جانب سے دائر کی گئیں 24 شکایات کا بھی جائزہ لیاا ور کونسل نے متفقہ طور پر ججز کیخلاف 19 شکایات کو نمٹانے کا فیصلہ کیا جبکہ دیگر 5 شکایات کو فی الحال مؤخر کر دیا ہے ۔ذرائع کے مطابق سپریم جوڈیشل کونسل نے ججز کیخلاف شکایات نمٹانے پر ان کے نام پبلک کرنے کی تجویز مسترد کر دی،ذرائع کے مطابق اجلاس میں یہ فیصلہ بھی ہوا کہ جن ججز کیخلاف شکایات نمٹائی جاتی ہیں ان کے نام پبلک نہ کرنے کا کونسل کا فیصلہ ہے ۔
