چینی مارکیٹ سے غائب ، شوگر ملوں کا حکومتی نرخ ماننے سے انکار
لاہور، سرگودھا(مانیٹرنگ ڈیسک،این این آئی)ملک میں چینی کی سب سے بڑی تھوک منڈی ‘اکبری مارکیٹ’سے چینی غائب ہوگئی جس کے بعد چینی کا نیا بحران سر پر منڈلانے لگا۔
لاہور کی اکبری منڈی کے سوداگروں نے بتایا کہ شوگر ملز مالکان نے 165 روپے کلو ایکس مل پرائس پر فراہمی کی شرط تو مان لی لیکن چینی کی فراہمی بند کردی ہے ۔ اکبری منڈی میں چینی کا سٹاک خاتمے کے قریب ہے ، کئی روز سے شوگر ملز نے چینی فراہم نہیں کی ہے ، اگر یہ سلسلہ جاری رہا تو چند روز میں چینی کے بحران کا خطرہ پیدا ہوجائے گا۔ڈیلرز ایسوسی ایشن کا کہنا ہے کہ شوگرملز سے 165 روپے کلوکے حکومتی نرخوں پرچینی فراہم نہیں کی جارہی، 165 روپے کلوکے حساب سے چینی ملے گی تو ہی حکومتی نرخ پربیچیں گے ۔ دوسری جانب پاکستان شوگر ملز ایسوسی ایشن کا دعویٰ ہے کہ شوگر ملیں 165 روپے ایکس مل قیمت پر چینی فراہم کر رہی ہیں۔وفاقی حکومت نے چینی کے ایکسپورٹرزاورڈیلرزکے خلاف تحقیقات کاآغازکردیا اور کئی مل مالکان اورشوگرڈیلرز کو بیرون ملک جانے سے روک دیا گیا۔ذرائع وزارت پیداوار کے مطابق حکومتی معاہدے کے بعد بھی شوگر ملز مالکان اور ڈیلرز کی طرف سے چینی کی قیمتوں میں کمی ممکن نہیں ہوسکی جس پر وفاقی حکومت ناراض ہے ۔
ذرائع نے بتایاکہ متعدد شوگر ملز مالکان اور ڈیلرز کو بیرون ملک سفر سے روک دیا گیا ہے اور پہلے مرحلے میں شوگر ڈیلرز کے نام ای سی ایل میں ڈالے جارہے ہیں۔ذرائع کے مطابق دسمبر میں چینی ایکسپورٹ کرنے والے ملز مالکان، ڈیلرز اور بیوروکریٹس سے باز پرس کی جائے گی اورذمہ داران کا تعین کیا جائے گا۔ذرائع وزارت پیداوار کا کہنا ہے کہ متعلقہ بیوروکریٹس سے بھی تفتیش کی جائے گی، ان اقدامات کا مقصد چینی کی قیمتوں اورسپلائی میں استحکام لانا ہے ۔ذرائع کے مطابق چینی کی 170 روپے کے لگ بھگ قیمت یقینی بنائی جائے گی تاکہ عوام سکھ کا سانس لیں۔ادھر سرگودھا میں مہنگی چینی فروخت کرنے پر 10افراد گرفتار کر کے 18دکانوں کو سیل کر دیا گیا۔ڈپٹی کمشنر کے مطابق گراں فروشی پر دکانداروں کو 2 لاکھ 2 ہزار روپے جرمانہ بھی کیا گیا ہے ۔ادھر وفاقی ادارہ شماریات نے ایک ہفتے کے دوران چینی کی قیمتوں میں 8روپے فی کلو گرام کمی کا دعویٰ کردیا، جبکہ مختلف شہروں میں چینی 172سے 200روپے فی کلو فروخت ہوتی رہی۔وفاقی ادارہ شماریات کے مطابق گزشتہ ہفتے چینی کی اوسط قیمت 8 روپے کی کمی سے 188روپے سے 180روپے فی کلو پر آگئی۔رپورٹ کے مطابق کراچی میں چینی سب سے زیادہ مہنگی رہی جہاں نرخوں کی ڈبل سنچری مکمل ہوگئی، پشاور میں چینی 190 روپے ، کوئٹہ میں 184، لاہور میں 180 جبکہ راولپنڈی اسلام آباد میں 185 روپے فی کلو فروخت ہوتی رہی۔
