پرامن احتجاج کی اجازت ملے گی
اسلام آباد(مانیٹرنگ ڈیسک)وزیرِ دفاع خواجہ آصف نے کہا ہے کہ اگر پی ٹی آئی 5 اگست کے مجوزہ احتجاج میں سیاسی رویہ اختیار کرتی اور پُرامن مظاہرہ کرتی ہے تو حکومت انہیں احتجاج کی اجازت دے گی۔۔۔
لیکن اگر ماضی کی طرح ہنگامہ آرائی، ریاستی املاک کو نقصان یا سرکاری مشینری کا استعمال دہرایا گیا تو قانون کے مطابق سخت کارروائی کی جائے گی۔اپنے ایک انٹرویو میں وزیردفاع خواجہ آصف نے کہا کہ ‘تحریک انصاف پہلے بھی 2،3 مرتبہ اسلام آباد آئی ہے ، وہ ہتھیار، کرینیں اور سرکاری گاڑیاں ساتھ لائے ۔ اگر اس بار بھی ایسا ہی رویہ اپنایا گیا تو ریاست اسی طرح ردعمل دے گی جیسے پہلے دیا۔ جلسہ میں اگر زبان اور اقدامات تشدد کی طرف لے جائیں گے تو ریاست خاموش نہیں رہے گی۔’وزیردفاع کا کہنا تھا کہ تحریک انصاف کو اب سنجیدگی سے سوچنا ہوگا کہ وہ کیا طرزِ عمل اپنانا چاہتی ہے ، اگر وہ تشدد سے باز رہیں گے تو انہیں جلسہ و احتجاج کا حق حاصل ہے ، ورنہ قانون نافذ کرنے والے ادارے حرکت میں آئیں گے۔
