پاکستان کی غزہ کیلئے 17 ویں امدادی کھیپ روانہ
اسلام آباد(وقائع نگار)وزیراعظم کی خصوصی ہدایت پر پاکستان کی جانب سے غزہ کیلئے مزید امدادی سامان روانہ کر دیا گیا،اسلام آباد انٹر نیشنل ایئر پورٹ سے 100 ٹن امدادی سامان پر مشتمل 17ویں کھیپ بذریعہ خصوصی پروازروانہ کی گئی۔۔۔
وفاقی حکومت کا غزہ کیلئے 200 ٹن امدادی سامان دو خصوصی پروازوں کے ذریعے روانہ کرنے کا منصوبہ ہے اور مزید 100 ٹن امدادی سامان چند دنوں میں روانہ کیا جائے گا، امدادی کھیپ میں 65ٹن تیار کھانا، 20 ٹن بچو ں کیلئے خشک دودھ، 5 ٹن بسکٹ اور 10 ٹن ادویات شامل ہیں، اب تک 17امدادی کھیپوں کے ذریعے بھیجی گئی امداد کا مجموعی وزن 1,715 ٹن ہے ، اگلے چند دنوں میں روانہ ہونے والی دوسری پرواز کے ساتھ مجموعی امدادی سامان 1,815 ٹن تک پہنچ جائے گا۔غزہ کیلئے سامان کی روانگی سے متعلق تقریب میں ڈپٹی وزیر اعظم اسحاق ڈار اور چیئرمین این ڈی ایم اے لیفٹیننٹ جنرل انعام حیدر ملک نے بطور مہمان خصوصی شرکت کی ،نائب وزیراعظم نے سامان کی فوری روانگی یقینی بنانے پر این ڈی ایم اے ، الخدمت فاؤنڈیشن اور دیگر فلاحی اداورں کی کوششوں کو سراہا اور ان کا شکریہ ادا کیا اور اس عزم کا اعادہ کیا کہ پاکستان اس مشکل وقت میں فلسطین کے عوام کے ساتھ کھڑا ہے اور ان کی ضروریات کو پورا کرنے کی ہر ممکن کوشش کرے گا۔
