ڈی جی خان :پولیس سے فائرنگ کا تبادلہ، انتہائی مطلوب دہشتگرد ہلاک
ڈیرہ غازی خان،لاہور(ڈسٹرکٹ رپورٹر،آئی این پی،دنیا نیوز )پنجاب پولیس سے فائرنگ کا تبادلہ، ٹارگٹ کلنگ اور سنگین جرائم میں انتہائی مطلوب دہشت گرد بلال کھوسہ ہلاک ہو گیا،ساتھی فرار۔
ترجمان پنجاب پولیس کے مطابق ڈیرہ غازی خان میں تھانہ کالا کی حدود میں پولیس ٹیم وین پر رات گئے معمول کے مطابق گشت پر تھی کہ جھاڑیوں میں چھپے دہشت گرد تنظیم ٹی ٹی پی (فتنہ الخوارج)کے نامعلوم دہشت گردوں نے اندھا دھند فائرنگ شروع کر دی، اہلکاروں نے بہترین حکمت عملی سے محفوظ پوزیشنز لیتے ہوئے جوابی کارروائی کی۔حکام کے مطابق فائرنگ کے تبادلے میں ایک حملہ آور مارا گیا جس کی شناخت بلال عرف بشیر کھوسہ کے نام سے ہوئی ہے جبکہ ہلاک دہشت گرد کے دیگر ساتھی پسپا ہو کر فرارہو گئے جن کی تلاش کے لیے سرچ آپریشن جاری ہے ۔ترجمان نے بتایا ہے کہ ہلاک ملزم اقدامِ قتل، ڈکیتی، رہزنی، دہشت گردی اور دہرے قتل جیسے کئی سنگین مقدمات میں سی ٹی ڈی کو بھی مطلوب تھا ۔ترجمان پنجاب پولیس نے یہ بھی بتایا کہ انٹیلی جنس رپورٹس کے مطابق بلال کھوسہ کا تعلق دہشت گرد تنظیم ٹی ٹی پی (فتنہ الخوارج)سے تھا اوروہ ریاستی اداروں کے خلاف منظم کارروائیوں میں ملوث تھا ۔آئی جی پنجاب پولیس ڈاکٹر عثمان انور نے خوارجی دہشت گرد کو ہلاک کرنے پر ڈیرہ غازی خان پولیس کو شاباش دی ہے۔
