اداروں کوسیاست میں گھسیٹنا عمران خان کی پرانی عادت:عظمیٰ
لاہور (سٹاف رپورٹر )وزیر اطلاعات و ثقافت پنجاب عظمیٰ بخاری نے کہاہے کہ پاکستان تمام ہمسایہ ممالک سمیت پوری دنیا سے خوشگوار اور دوستانہ تعلقات کا خواہاں ہے ، مگر بھارت کا یاتریوں کو پاکستان نہ آنے دینا افسوسناک اور غیرذمہ دارانہ اقدام ہے ۔
عمران خان کو اداروں کو سیاست میں گھسیٹنے اور الزام تراشی کی پرانی عادت ہے ،فیلڈ مارشل نے جب وزیر اعظم ہاؤس میں موجود بشریٰ بی بی کی سرگرمیوں کی نشاندہی کی تو عمران خان اسی دن سے موجودہ عسکری قیادت کے مخالف ہوگئے ۔ ان کا وتیرا ہے کہ جو بھی ملک و قوم کی بھلائی اور بہتری کیلئے کام کرے گا، خان صاحب کو اس سے مسئلہ ہوگا۔ فساد گروپ نے 14 اگست پر احتجاج کی کال دے کر پھر ملک دشمنی کا ثبوت دیا ہے ۔ہفتہ اقلیت کارواں کی اختتامی تقریب سے خطاب کرتے ہوئے انہوں نے کہا کہ پنجاب حکومت نے یوم آزادی کو معرکہ حق کے بعد اس بار مزید بھرپور اور تاریخی انداز میں منانے کا فیصلہ کیا ہے ،اس بار جشن آزادی کا عنوان ’’حصولِ آزادی سے تحفظِ آزادی تک‘‘رکھا گیا ہے ،14اگست کی مرکزی تقریب حضوری باغ میں اور ایک بڑی تقریب ایکسپو سنٹر لاہور میں ہوگی، آج مینار پاکستان کے سائے میں کھڑے ہو کر ہم یہ عہد کرتے ہیں کہ ہر مذہب اور ہر رنگ و نسل کے پاکستانی کو برابر کا درجہ ملے گا۔ انہوں نے کہاکہ ملک میں ایک فساد گروپ ہر موقع پر نفرت پھیلانے کی کوشش کرتا ہے ، عالیہ حمزہ کی ٹائم لائن اٹھا کر دیکھ لیں سب حقیقت سامنے آ جائے گی۔
