راجہ بشارت ، صنم جاوید کی عبوری ضمانتیں خارج
اسلام آباد، لاہور ، راولپنڈی (اپنے نامہ نگارسے ، کورٹ رپورٹر )جوڈیشل مجسٹریٹ شائستہ کنڈی کی عدالت نے 5 اگست احتجاج پر درج مقدمہ میں گرفتارپی ٹی آئی کی 7 خواتین کارکنوں کی ضمانت بعد از گرفتاری کی درخواستیں منظور کرلیں۔
گزشتہ روز ضمانت بعد ازگرفتاری کی درخواستوں پر سماعت کے دوران وکلاء کے دلائل مکمل ہونے اور پولیس ریکارڈ دیکھنے کے بعد عدالت نے 20،20 ہزار روپے مچلکوں کے عو ض تمام خواتین کارکنوں کی ضمانت منظور کرنے کا حکم سنادیا۔پی ٹی آئی خواتین کارکنان کے خلاف پاپو ایکٹ و دیگر دفعات کے تحت تھانہ لوہی بھیر میں مقدمہ درج ہے ۔لاہور کی انسداد دہشت گردی عدالت نے جناح ہائوس کے قریب پولیس کی گاڑیاں جلانے سمیت 9 مئی کے پانچ مقدمات میں فواد چودھری کی عبوری ضمانت میں 26 ستمبر تک توسیع کر دی ۔انسدادی دہشتگردی عدالت لاہور کے جج منظر علی گل نے سابق وفاقی وزیر فواد چودھری کی عبوری ضمانت پر سماعت کی۔ درخواست گزار نے موقف اختیار کیا کہ سیاسی بنیادوں پر مقدمات میں نامزد کیا گیا جلاؤ گھیراؤ سے کوئی لینا دینا نہیں ۔انسداد دہشت گردی عدالت میں نومبر ستمبر اکتوبر احتجاج کے مقدمات کی سماعت ہوئی، راجہ بشارت اور صنم جاوید کی عبوری ضمانتیں خارج کر دی گئیں۔جج امجد علی شاہ نے مقدمات پر سماعت کی، راجہ بشارت کی جانب سے پیش میڈیکل سرٹیفکیٹ مسترد کر دیاگیا ، راجہ بشارت کی اٹک کے تین مقدمات میں عبوری ضمانت خارج کی گئی، ان تین مقدمات میں عبوری ضمانت کی درخواستوں پر فریقین کے دلائل مکمل ہو چکے تھے ۔
