ملک بھر میں ضلعی انتظامیہ کے ڈھانچے میں تبدیلی کا فیصلہ
اسلام آباد(مانیٹرنگ ڈیسک)ملک بھر میں ضلعی انتظامیہ کے قانونی اور انتظامی ڈھانچے میں تبدیلی کا فیصلہ کرلیاگیا،وزیراعظم نے سفارشات طلب کرلیں اورضلعی انتظامی اور قانونی ڈھانچے پر سفارشات کی تیاری کیلئے 18رکنی کمیٹی بھی تشکیل دے دی گئی۔
ذرائع کے مطابق وزیراعظم کی منظوری کے بعد کابینہ سیکرٹریٹ کی جانب سے غیر معمولی گزٹ نوٹیفکیشن جاری ہوا جس میں کمیٹی کو ایک ماہ کی ڈیڈ لائن دیتے ہوئے سفارشات طلب کی گئی ہیں۔ وزیر قانون اعظم نذیر تارڑ اور وزیر اسٹیبلشمنٹ احد چیمہ کو کنونیئر مقرر کیا گیا ہے جبکہ وزیراعظم کے مشیر توقیر شاہ، اٹارنی جنرل، سیکرٹری کیبنٹ، سیکرٹری کامرس، سیکرٹری پاور ڈویژن ارکان میں شامل ہیں۔چاروں صوبوں، آزاد کشمیر، گلگت بلتستان کے چیف سیکرٹریز کے علاوہ نبیل اعوان، ناصر محمود کھوسہ، آغا واصف، پسند خان بلیدی، نسیم صادق کو بھی کمیٹی میں بطور رکن شامل کیا گیا ہے ۔ کمیٹی بہتر طرز حکمرانی اور خدمات کی فراہمی کیلئے اقدامات تجویز کرے گی اور ضلعی انتظامیہ کی قانونی، ریگولیٹری، انتظامی اور آپریشنل افادیت کو بڑھانے کیلئے سفارشات مرتب کرے گی۔
