دنیا میں سامراجی نظام مسلط ، مسلمانوں پر ظلم جاری :حافظ نعیم
اقامت دین کی تحریکوں کو جامع اور مربوط حکمت عملی سے آگے بڑھنا ہوگا
لاہور(سٹاف رپورٹر)امیر جماعت اسلامی پاکستان حافظ نعیم الرحمن نے کہا ہے کہ دنیا میں سامراجی نظام مسلط ہیں، فلسطین، کشمیر سمیت کئی خطوں میں مسلمانوں اور دیگر مظلوم قوموں پر ظلم و جبر جاری ہے ، سامراج سے نجات کیلئے اقامت دین کی تحریکوں کو جامع اور مربوط حکمت عملی سے آگے بڑھنا ہوگا، مدرسین، علما ء فروعی اختلافات سے بالاتر ہو کر مشترکات پر امت کو اکٹھا کریں۔ان خیالات کا اظہار انہوں نے منصورہ میں دینی مدارس کے اساتذہ سے خطاب کرتے ہوئے کیا۔ نائب امیر جماعت اسلامی پاکستان ڈاکٹر عطا الرحمن، سیکرٹری اطلاعات شکیل احمد ترابی، حافظ سیف اللہ اور ناصر بلال بھی اس موقع پر موجود تھے ۔ حافظ نعیم الرحمن نے کہا کہ اہل غزہ نے ثابت کیا کہ وہ عظیم قوم ہیں، حماس نے اسرائیل سمیت دنیا بھر کی طاقتوں کو مذاکرات پر مجبور کیا اور اپنی شرائط پر ٹرمپ معاہدہ پر پیش قدمی کی۔ انہوں نے کہا کہ مدارس کے اساتذہ پر بھاری ذمہ داری ہے کہ وہ خلوص، عمل اور علم سے عوام کے دل و دماغ کو متاثر کریں ، دلیل کی بنیاد پر اختلاف رائے ہماری کمزوری نہیں طاقت ہے ، لبرل اور سیکولر طبقات کی تنقید کو بالائے طاق رکھ کر ہمیں معاشرے میں اسلامی اقدار کے فروغ کی جدوجہد جاری رکھنی ہے ، نتائج اللہ تعالیٰ کے پاس ہیں۔
