ملکی تاریخ کا سب سے بڑا کنٹینر بردار بحری جہاز کراچی پہنچ گیا
400 میٹر طویل، 24,070 ٹی ای یوز گنجائش والا ایم ایس سی مکول ساؤتھ ایشیا پاکستان ٹرمینل پر کامیابی سے لنگرانداز ہوا ہچیسن پورٹس نے برتھنگ کیلئے سہولیات فراہم کیں،جہاز کی آمدعالمی شپنگ لائنز پاکستان کی بحری صلاحیت پر اعتماد کی عکاس
کراچی (کامرس رپورٹر، مانیٹرنگ ڈیسک) پاکستان کی گہرے پانی کی بندرگاہ پر ملکی تاریخ کا سب سے بڑا کنٹینر بردار بحری جہاز لنگر انداز ہوگیا۔ترجمان ساؤتھ ایشیا پاکستان ٹرمینل کی جانب سے جاری بیان کے مطابق 400 میٹر لمبا اور 24,070 ٹی ای یوز گنجائش والا ایم ایس سی مکول کراچی پہنچ گیا۔ ایم ایس سی مکول جہاز ساؤتھ ایشیا پاکستان ٹرمینل پر کامیابی سے لنگر انداز ہوا۔ہچیسن پورٹس پاکستان نے جہاز کی برتھنگ کے لیے عالمی معیار کی سہولیات فراہم کیں، ایم ایس سی مکول دنیا کے جدید ترین اور بڑے کنٹینر جہازوں میں شمار ہوتا ہے ۔بڑے جہاز کی آمد پاکستان کی بحری تاریخ میں نیا سنگ میل ہے ، ساؤتھ ایشیا پاکستان ٹرمینل ملک کا واحد گہرے پانی کا کنٹینر ٹرمینل ہے ۔دنیا کے بڑے بحری جہازوں کی آمد عالمی شپنگ لائنز کے پاکستان کی بحری صلاحیت پر بڑھتے ہوئے اعتماد کا ثبوت ہے ، بڑے جہازوں کی برتھنگ سے تجارتی کارکردگی میں نیا اضافہ متوقع ہے ۔
یہ دنیا کے سب سے جدید اور بڑے جہازوں میں سے ایک ہے اور پاکستان کی بندرگاہ پر آنے والا سب سے بڑا جہاز ہونے کی حیثیت سے ملک کی بحری تاریخ میں ایک تاریخی سنگ میل کی حیثیت رکھتا ہے ۔ پاکستان میں اس نوعیت کے انتہائی بڑے جہازوں کو لنگر انداز کرنے والے واحد ٹرمینل کی حیثیت سے ، ہچیسن پورٹس پاکستان مسلسل پورٹ انفرااسٹرکچر اور آپریشنل مہارت کے نئے معیار قائم کر رہا ہے ۔ ایم ایس سی مکول کی آمد عالمی شپنگ لائنز کے پاکستان کی بحری صلاحیت پر بڑھتے ہوئے اعتماد کی عکاسی کرتی ہے اور ٹرمینل کے عالمی معیار کی صلاحیت کو اجاگر کرتی ہے ،بڑے جہازوں کو سنبھالنے کی صلاحیت نہ صرف تجارتی کارکردگی کو بہتر بناتی ہے بلکہ فریٹ لاگت میں کمی کے ذریعے پاکستان کی معیشت کو براہِ راست فائدہ پہنچاتی ہے ،جس سے برآمدات مزید مسابقتی اور درآمدات زیادہ مؤثر لاگت پر ممکن ہو جاتی ہیں۔
