حکومت نے تعلیم کیلئے ریکارڈ فنڈ مختص کئے :سپیکر پنجاب اسمبلی
ہر شہری کو تعلیم یافتہ بنانا بڑا چیلنج ، اب بھی اڑھائی کروڑ بچے سکولوں سے باہر نجی ادارے طلبہ پر فی کس ساٹھ ہزار فی ہفتہ خرچ کرتے ہیں:ملک احمد خان
لاہور(سیاسی نمائندہ)سپیکر پنجاب اسمبلی ملک احمد خان نے کہا ہے کہ ہر شہری کو تعلیم یافتہ بنانا ریاست کیلئے بڑا چیلنج ہے ، اس وقت بھی اڑھائی کروڑ بچے سکولوں سے باہر ہیں،آبادی کے تناسب سے پچھلی دو دہائیوں سے تعلیم سے محروم بچوں کے اعداد و شمار یہی ہیں تاہم پنجاب میں پہلی مرتبہ تعلیم کیلئے ریکارڈ فنڈموجودہ حکومت نے مختص کئے ہیں ، تعلیم کا بجٹ 17 ارب سے بڑھا کر 46 ارب روپے کر دیا ۔وہ ملتان میں یونیورسٹی کے کانووکیشن 2025ء سے بطور مہمان خصوصی خطاب کر رہے تھے ۔اس موقع پرسپیکر پنجاب اسمبلی نے فارغ التحصیل طلبا و طالبات میں ڈگریاں اور سرٹیفکیٹ بھی تقسیم کئے ۔ ملک احمد خان نے مزید کہا کہ نجی تعلیمی ادارے اپنے طلبہ پر فی کس دس سے ساٹھ ہزار روپے فی ہفتہ خرچ کرتے ہیں جبکہ سرکاری ادارے جہاں 97 فیصد بچے پڑھتے ہیں ان میں سالانہ فی کس 25 سے 30 ہزار روپے خرچ ہوتے ہیں، ایسے میں سرکاری اداروں کے بچے نجی اداروں کے طلبا سے کیونکر مقابلہ کر سکتے ہیں۔ انہوں نے مزید کہا کہ نجی اداروں کو چاہئے تعلیمی مساوات کے لئے اپنے وسائل بروئے کار لائیں۔انہوں نے ڈگری حاصل کرنے والے طلبا و طالبات کو مخاطب کرتے ہوئے کہا کہ آپ ہمارا مستقبل ہیں، آج آپ اپنے اپنے شعبے کی اعلیٰ تعلیم لے کر فارغ التحصیل ہو رہے ہیں آپ کو چاہئے ملک کی ترقی کے لئے اپنی بہترین صلاحیتیں بروئے کار لائیں۔
