لاہور میں ایمرجنسی فری موبائل فون چارجنگ سروس کا آغاز
پینک بٹن، فری وائی فائی، ایمرجنسی فری موبائل فون چارجنگ اورسیفٹی زونز شامل 30 اہم مقامات پر ایمرجنسی فری موبائل فون پورٹس فعال، 100 کا منصوبہ بنایا گیا
لاہور (کرائم رپورٹر )وزیرِ اعلیٰ پنجاب مریم نوازکی ہدایت پر پنجاب سیف سٹیز اتھارٹی کا لاہور میں ایمرجنسی فری موبائل فون چارجنگ سروس کا آغاز کر دیا گیا۔ ترجمان پنجاب سیف سٹیز اتھارٹی کے مطابق اس منصوبے کے تحت لاہور کے مختلف اہم مقامات پر ایک ہی جگہ چار جدید سہولیات فراہم کی جا رہی ہیں، جن میں پینک بٹن، سی ایم مریم نواز فری وائی فائی، ایمرجنسی فری موبائل فون چارجنگ اور 24 گھنٹے شہریوں کی نگرانی پر مشتمل سیفٹی زونز شامل ہیں۔ ان سہولیات کا مقصد ہنگامی صورتحال میں شہریوں کو فوری مدد فراہم کرنا اور عوامی تحفظ کو مزید مؤثر بنانا ہے ۔ترجمان کے مطابق ابتدائی مرحلے میں لاہور کے 30 اہم مقامات پر ایمرجنسی فری موبائل فون چارجنگ پورٹس فعال کر دی گئی ہیں، جبکہ آئندہ مرحلوں میں اس سہولت کو وسعت دیتے ہوئے اسے 100 مقامات تک پہنچانے کا منصوبہ بنایا گیا ہے ۔ شہریوں نے اس جدید سہولت سے استفادہ کرنا شروع کر دیا ہے ، جس سے نہ صرف ہنگامی حالات میں رابطے ممکن ہو رہے ہیں بلکہ شہریوں میں احساسِ تحفظ بھی بڑھ رہا ہے ۔
