آلوکی فصل زیادہ ،نرخ انتہائی کم،17روپے کلوتک فروخت
120 کلو والی بوری 2500 روپے میں فروخت ،گزشتہ سال قیمت 10ہزارتھی حکومت کسانوں کو تباہ حالی سے بچانے کیلئے ایکسپورٹ کرے :صدر کسان اتحاد
لا ہور( کامرس رپورٹر)امسال آلو کی فصل گزشتہ سیزن کے مقابلے میں زیادہ ہونے کا امکان ہے لیکن نرخ نسبتاً انتہائی کم ہیں ۔ معلوم ہواہے گزشتہ سیزن کا آلو ابھی تک سٹورز میں موجودہے اور نئی فصل بھی مارکیٹ میں آنے لگی،ڈیمانڈ انتہائی کم ہونے کے باعث آلو کی قیمت بری طرح متاثر ہوئی ،گزشتہ سیزن میں 90 ملین ٹن آلو کی فصل حاصل کی گئی اوربیشتر آلو سٹورز میں محفوظ کرلیا گیا تھا ،آلو کی ایکسپورٹ نہ ہونے سے مارکیٹ میں طلب و رسد میں بگاڑ پیدا ہوگیا ۔کچی پٹائی کے آلوکی مارکیٹ میں 120 کلو والی بوری 1500 سے لیکر 2500 روپے تک فروخت ہو رہی ہے ،یہی آلوگزشتہ سال8 ہزار سے 10ہزار روپے فی بوری بکتا رہا ۔
ذرائع کے مطابق امسال سیزن میں آلو کی فصل120 ملین ٹن تک جانے کا امکان ہے ، گزشتہ سیزن میں نئی فصل کا اوسطاً 75 روپے فی کلو تک بکنے والا آلو رواں سیزن میں 17 سے 20 روپے کلو تک بک رہا ہے ۔اس حوالے سے صدر کسان اتحاد خالد کھوکھر نے کہا ہے کہ حکومت کسانوں کو تباہ حالی سے بچانے کیلئے ریلیف فراہم کرے اور 1988 ئکی طرح آلو کی فصل کسانوں سے خود خرید کر ایکسپورٹ کرے ،بارڈرز بند ہونے کے باعث سٹورز میں پڑا آلو فروخت نہیں ہوسکا، اگر حکومت نے آلو کی فصل پر ریلیف نہ دیا تو آئندہ کی فصلوں کی کاشت بری طرح متاثر ہو گی۔
