محمد علی مرزا گستاخی کیس، نظریاتی کونسل کی رائے معطلی حکم میں توسیع
اسلام آباد (اپنے نامہ نگار سے ) اسلام آباد ہائیکورٹ کے جسٹس محسن اختر کیانی نے انجینئر محمد علی مرزا کو گستاخی کا مرتکب قرار دینے کی اسلامی نظریاتی کونسل کی رائے معطل کرنے کے حکم میں توسیع کرتے ہوئے آئندہ سماعت پر اٹارنی جنرل سے معاونت طلب کرلی۔
اسلامی کونسل کی رائے کے خلاف اسلم خاکی کی درخواست پر سماعت کے دوران عدالتی حکم کے باوجود اٹارنی جنرل پاکستان پیش نہ ہو سکے ، اسسٹنٹ اٹارنی جنرل عثمان گھمن نے عدالت کو بتایا کہ اٹارنی جنرل دیگر مصروفیات کی وجہ سے پیش نہیں ہو سکتے ، اگر عدالت کہے تو ایڈیشنل اٹارنی جنرل پیش ہو جائیں گے ۔ جسٹس محسن اختر کیانی نے ریمارکس دیئے کہ اٹارنی جنرل ہی پیش ہوں گے ، گزشتہ سماعت پر بھی کہا تھا اٹارنی جنرل پیش ہوکر عدالتی معاونت کریں، اسسٹنٹ اٹارنی جنرل نے کہا ایک تاریخ دے دیں، آئندہ سماعت پر اٹارنی جنرل پیش ہوکر عدالت کی معاونت کر دیں گے ۔ عدالت نے استدعا منظور کرتے ہوئے سماعت 7اپریل تک ملتوی کر دی۔
